მოლებსა და ბაზრობებზე დასაქმებულების ტესტირებას სახელმწიფო უზრუნველყოფს. როგორც ჯანდაცვის მინისტრის მოადგილემ სამინისტროს შრომის პირობების ინსპექტირების დეპარტამენტის უფროსმა ბექა ფერაძემ განაცხადა, მოლებსა და ბაზრობებზე დასაქმებულების პირველი ტესტირება სუბსიდირებული იქნება სახელმწიფოს მხრიდან და ეს იქნება ობიექტების გახსნის წინაპირობა.
“ჩვენ შევთანხმდით, რომ ტესტირება იანვრის თვეში განხორციელდება სახელმწიფოს მხრიდან, ხოლო უკვე თებერვლის თვიდან სხვადასხვა მექანიზმზე ვმსჯელობთ, აუცილებლად უნდა შემოვიდეს უკვე კერძო სექტორის მექანიზმები, რომ მათ დაფინანსება სხვადასხვა მიმართულებით განახორციელონ იმისთვის, რომ დაიცვან თითოეული დასაქმებული, მართონ ინფექცია და ტესტირება არის ერთ-ერთი საუკეთესო საშუალება. თუ რა დოზით და როგორ განხორციელდება, ამაზე მიმდინარეობს მსჯელობა, თუმცა პირველი ტესტირება იქნება სუბსიდირებული სახელმწიფოს მხრიდან, ეს იქნება გახსნის წინაპირობა. ჩვენ ასევე ვისაუბრეთ პლატფორმაზე და მოხდება მონიტორინგი თუ პროცენტულად რამდენი ადამიანი გაიტესტა ამა თუ იმ დაწესებულებაში და ამის საფუძველზე კვოტირება იქნება განსაზღვრული მათ მიმართ და მუდმივი მონიტორინგის მექანიზმებით ჩვენ განვახორციელებთ კონტროლს”, - განაცხადა ბექა ფერაძემ.