"ენგურჰესის" 3-4 თვიანი გაჩერებით ენერგოსისტემას ზიანი არ მიადგება, - მიიჩნევს ეკონომიკისა და მდგრადი განვითარების მინისტრის მოვალეობის შემსრულებელი. ნათია თურნავა ამბობს, რომ ჰესის რეაბილიტაციის პროცესში ოკუპირებული აფხაზეთი რუსეთიდან იმპორტირებული ელექტროენერგიით მომარაგდება და ანაზღაურებაც აფხაზური მხარის მიერ მოხდება.
"ენგურჰესი" ჩვენი სიმდიდრე და იაფიანი ენერგიაა. იქიდან გამომდინარე, რომ წყლის დანაკარგი გაიზარდა, გვირაბი არაა საუკეთესო მდგომარეობაში, შევარჩიეთ ზამთრის პერიოდი რეაბილიტაციისთვის, რადგან ამ პერიოდში ყველაზე დაბალია წყალი და გამომუშავება მინიმალურია. "ენგურჰესის" 3-4 თვიანი გაჩერებით ზიანი არ მიადგება ჩვენს ენერგოსისტემას, რადგან სეზონურად ამ დროს გამომუშავება მინიმალურია.
რაც შეეხება, ამ პერიოდში როგორ მოხდება აფხაზეთის ელექტროენერგიით მომარაგება, იქ უკვე გაკეთდა განცხადება, რომ ისინი იღებენ იმპორტულ ელექტროენერგიას რუსეთიდან და ანაზღაურებაც მათი მხრიდან ხორციელდება, ანუ ჩვენ ამ მიმართულებით არ ვმონაწილეობთ", - განაცხადა ნათია თურნავამ.
