"იარაღის ძირითადი მასა, რომელსაც ჩრდილოკავკასიელი ბოევიკები გამოიყენებენ, სამხედრო ნაწილებიდანაა გამოტანილი", _ ეს განცხადება რუსეთის გენპროკურორის მოადგილემ ივან სიდორუკმა გააკეთა.
"სიტუაცია სულ უფრო და უფრო მწვავდება, მათ შორის ჩრდილო-კავკასიის ფედერალური ოლქის ტერიტორიაზე არსებული კორუფციის მაღალი დონით", _ აცხადებს სიდორუკი.
მისი თქმით, სამართალდამცავი ორგანოების წარმომადგენელთა მიმართ აქციები დიდი გულისყურით იგეგმება. 2010 წლის ცხრა თვის განმავლობაში მოკლულია სამართალდამცავი ორგანოების 205 თანამშრომელი და დაჭრილია 489.
"რეგიონებს შორის ყველაზე პრობლემატურად მიიჩნევა დაღესტანი, ჩეჩნეთი, ინგუშეთი - აქ ძალოვნები იღუპებიან სპეცოპერაციების დროს. ასევე ყაბარდო-ბალყარეთი სადაც ძალოვნებზე ნადირობაა გამოცხადებული", _ აცხადებს რუსეთის გენპროკურორის მოადგილე და დასძენს, რომ ბანდფორმირებების ჩეჩნური ფრთა გაკაევის მეთაურობით ახლახან დოკუ უმაროვის დაქვემდებარებიდან გამოვიდა და "თვითდამკვიდრებას ნებისმიერი მეთოდებით ცდილობს".
