სატყეო სააგენტოს საშეშე ხე-ტყის დამზადების უფლება მიენიჭება. აღნიშნული უფლების მინიჭებას მთავრობა იმ არგუმენტით ხსნის, რომ კონფლიქტისპირა ზონის მცხოვრებლები ზამთარში სათბობი მასალით დროულად მომარაგდნენ.
სატყეო სააგენტოსთვის ამ უფლების მინიჭება საკანონმდებლო ცვლილებას საჭიროებს. შესაბამისი საკანონმდებლო ინიციატივა მთავრობამ პარლამენტში შეიტანა და დაჩქარებული წესით განხილვაც მოითხოვა. როგორც ბიუროს სხდომაზე მთავრობის საპარლამენტო მდივანმა გია ხუროშვილმა განმარტა, თუკი აღნიშნული პროექტი დროულად არ იქნება მიღებული და კანონში არ შევა სათანადო ცვლილება, სატყეო სააგენტოს საშეშე ხე-ტყის დამზადების უფლება არ ექნება და პრობლემები შეექმნება აღნიშნული კატეგორიის მცხოვრებლებს.
პარალმენტის თავმდჯომარე მთავრობის ამ მოთხოვნას დასთანხმდა. აღნიშნული კანონპროექტი მიმდინარე სასესიო კვირას დაჩქარებული წესით იქნება მიღებული, თუმცა ამის გამო მთავრობამ პარალმენტის თავმჯდომარის საყვედური დაიმსახურა.
ბაქრაძემ მთავრობას უსაყვედურა და განაცხადა, რომ ორი კვირის წინ რომ შემოეტანათ ეს ინიციატივა, დაჩქარებული წესით განხილვა არ იქნებოდა საჭირო. ბაქრაძის თქმით, ახლა მოსახლეობის ხარჯზე არ მოხდება მთავრობის დასჯა, თუმცა ისიც განაცხადა, რომ სხვა შემთხვევაში პარლამენტი მთავრობის ასეთ არგუმენტებს აღარ გაითვალისწინებს.
რაც შეეხება უშუალოდ ინიციატივას, როგორც გია ხუროშვილი განმარტავს, სატყეო სააგენტოს მიენიჭება უფლება, დაამზადოს საშეშე ხე-ტყე, რომელიც კონფლიქტისპირა ზონებში განლაგებულ სოფლებს, ასევე საგანმანათლებლო დაწესებულებებს დაუბრუნდებათ 2-2 კუბური მეტრის ოდენობით. ხუროშვილმა აღნიშნა, რომ გათვალისწინებულია შეშით მომარაგება დაახლოებით 5 500 ოჯახისთვის.
