დემოკრატიული მოძრაობის ლიდერის, ნინო ბურჯანაძის მტკიცებით, სკოლებში მშობლიური ენის საათები მცირდება. ამის შესახებ ბურჯანაძემ დღეს გამართულ ბრიფინგზე განაცხადა. მისი თქმით, რამდენიმე სკოლაში უკვე დაიბარეს მშობლები და გამოუცხადეს, რომ უახლოეს მომავალში მშობლიური ენის გაკვეთილების საათები შემცირდება.
"ნათლად ჩანს, როგორ მიზანმიმართულად ებრძვის ქართულ ენას და ყველაფერს ქართულს საქართველოს დღევანდელი ხელისუფლება და ამის თაობაზე არაერთხელ განგვიცხადებია. სააკაშვილი და მისი რეჟიმი, რომლებიც აცხადებენ, რომ ქართული ენის ქანდაკებას დგამენ, სინამდვილეში ჩვენს სკოლებში მშობლიური ენის საათებს მინიმუმამდე ამცირებენ, რაც საბჭოთა კავშირის დროსაც არ გაკეთებულა", _ აღნიშნა ბურჯანაძემ.
მისი თქმით, დღევანდელი ხელისუფლება საკუთარ მოსახლეობაზე და ბავშვებზე ექსპერიმენტებს ატარებს.
"ბათუმისთვის გამოყოფილი სპეცტრანსფერი, 125 მილიონი, რომელიც ე. წ. სიყვარულის ქანდაკების დადგმაში იხარჯება, ასევე ქუთაისის ბიუჯეტში გადაქაჩული 51 მილიონი, რომელიც პარალმენტის ახალი შენობის ადგილას არსებული ნაგებობების დემონტაჟს უნდა მოხმარდეს, კიდევ ერთხელ მიანიშნებს, რომ დღევანდელი ხელისუფლება არ არის დაინტერესებული, ქვეყანაში განათლებული თაობა არსებობდეს. ეს 2010 წლის ეროვნულ გამოცდებზე კიდევ ერთხელ დაფიქსირდა, რადგან ჩვენი ახალგაზრდობის განათლების მაჩვენებელი ძალიან დაბალი იყო", - აღნიშნა ბურჯანაძემ.
