იანვარ-სექტემბერში ათი უმსხვილესი სავაჭრო პარტნიორის წილმა საქართველოს მთლიან საგარეო სავაჭრო ბრუნვაში 67 პროცენტი შეადგინა. "საქსტატის" ინფორმაცით, უმსხვილეს სავაჭრო პარტნიორებს შორის იყო თურქეთი (770 მლნ. აშშ დოლარი), აზერბაიჯანი (486 მლნ. აშშ დოლარი) და უკრაინა (445 მლნ. აშშ დოლარი).
შეგახსენებთ, რომ იანვარ-სექტემბერში საქართველოს საგარეო სავაჭრო ბრუნვამ (არაორგანიზებული ვაჭრობის გარეშე) 4608 მლნ. აშშ დოლარი შეადგინა, რაც წინა წლის ანალოგიურ მაჩვენებელზე 17 პროცენტით მეტია. "საქსტატის" ინფორმაციით, მთლიან სავაჭრო ბრუნვაში 1098 მლნ. აშშ დოლარის ექსპორტი იყო (34 პროცენტით მეტი), ხოლო იმპორტი - 3511 მლნ. აშშ დოლარი (13 პროცენტით მეტი). საქართველოს უარყოფითმა სავაჭრო ბალანსმა 2010 წლის იანვარ-სექტემბერში 2413 მლნ. აშშ დოლარი შეადგინა (5 პროცენტით მეტი).
"საქსტატში" განმარტავენ, რომ 2010 წლის იანვარ-სექტემბერში 2008 წლის ანალოგიურ პერიოდთან შედარებით საგარეო სავაჭრო ბრუნვა 24 პროცენტით, ექსპორტი 11 პროცენტით, ხოლო იმპორტი 27 პროცენტით შემცირდა. რაც შეეხება უარყოფით სავაჭრო ბალანსს, 2010 წლის იანვარ-სექტემბერში 32 პროცენტით ნაკლები დაფიქსირდა, ვიდრე 2008 წლის შესაბამის პერიოდში.
