ევროპული საქართველოს ზუგდიდის მაჟორიტარობის კანდიდატის, გიგი უგულავას თქმით, მზადაა, რომ ზუგდიდში, ბანკში მყოფ მძევლებს ჩაენაცვლოს.
"თუკი ახლა გვისმენს გამტაცებელი, მე რამდენადაც ვიცი 3 მძევალია დარჩენილი და მზად ვარ ჩავენაცვლო მძევლებს, ვისაც როგორ უნდა ისე გაიგოს, მზად ვარ ჩავენაცვლო მძევლებს, თუ ამის შესაძლებლობა და ორმხრივი თანხმობა არის", - აცხადებს უგულავა.
ზვიად გამსახურდიას გამზირზე მდებარე ერთ-ერთ ბანკში შეიარაღებული პირის შეჭრის შესახებ შეტყობინება შინაგან საქმეთა სამინისტროში დაახლოებით 14:21 საათზე შევიდა.
პოლიციის თანამშრომლებმა შემოსაზღვრეს შემთხვევის ადგილის მიმდებარე ტერიტორია და დაიწყო დამნაშავის გაუვნებელყოფის ოპერაცია. ამჟამად ადგილზე მობილიზებული არიან სამართალდამცველები, მიმდინარეობს საგამოძიებო და ოპერატიული ღონისძიებები.
მომხდარ ფაქტზე გამოძიება სისხლის სამართლის კოდექსის 179-ე, 236-ე და 144-ე მუხლებით დაიწყო. შინაგან საქმეთა სამინისტრო საზოგადოებას ინფორმაციას ეტაპობრივად მიაწვდის.
