საქართველოს საგარეო სამინისტრომ ოკუპირებული პერევიდან რუსეთის შეიარაღებული ძალების გაყვანასთან დაკავშირებით განცხადება გააკეთა. აღნიშნულ ფაქტს საგარეო საქმეთა სამინისტრო აფასებს სწორი მიმართულებით გადადგმულ ნაბიჯად.
"2010 წლის 18 ოქტომბერს რუსეთის ფედერაციამ თავისი შეიარაღებული ძალები გაიყვანა საჩხერის რაიონის ოკუპირებულ სოფელ პერევიდან. თითოეული სოფლის დეოკუპაცია უაღრესად მნიშვნელოვანია საქართველოსთვის და განსაკუთრებით ამ სოფლების მოსახლეობისთვის. თუმცა პერევიდან საოკუპაციო ჯარის გაყვანა მხოლოდ მიკროსკოპული ნაბიჯია იმ ვალდებულებების ფონზე, რომლებიც რუსეთმა უნდა შეასრულოს 2008 წლის 12 აგვისტოს ცეცხლის შეწყვეტის შეთანხმების თანახმად", - აღნიშნულია განცხადებაში.
განცხადების მიხედვით, საგარეო საქმეთა სამინისტროს სურს კიდევ ერთხელ გაახსენოს საერთაშორისო თანამეგობრობას, რომ რუსეთი აგრძელებს 2008 წლის 12 აგვისტოს ცეცხლის შეწყვეტის შეთანხმების უხეშ დარღვევას.
მათი განმერტებით, რუსეთის ფედერაციას ჯერ კიდევ ოკუპირებული აქვს საქართველოს ტერიტორიის 20 პროცენტი, ხოლო ოკუპირებულ რეგიონებში განლაგებული ჰყავს რამდენიმე სამხედრო ბაზა და ათი ათასამდე სამხედრო მოსამსახურე.
ქართული მხარე კვლავ მოუწოდებს რუსეთის ფედერაციას, პატივი სცეს საერთაშორისო სამართლის ნორმებს და პრინციპებს, ბოლომდე შეასრულოს ცეცხლის შეწყვეტის ექვსპუნქტიანი შეთანხმება და მოახდინოს ცხინვალის რეგიონის/სამხრეთ ოსეთი, საქართველო და აფხაზეთის, საქართველო სრული დეოკუპაცია.
