გიორგი ვაშაძესა და თაკო ჩარკვიანს გარკვეული უთანხმოება "ნაციონალურ მოძრაობასთან" ჰქონდათ, - განაცხადა კოალიცია „ძალა ერთობაშია“-ს ერთი წევრმა მამუკა გამყრელიძემ.
მისი თქმით, კოალიციიდან პოლიტიკოსების წასვლის მიუხედავად, არჩევნებში "ძალა ერთობაშია" ყველაზე მეტ ხმას მიიღებს.
"ჩვენთან არანაირი პრობლემა არ ჰქონია, იმ შემადგენლობასთან, ვინც არის ამ გაერთიანებაში, თუ რამე პრობლემა იყო "ნაციონალურ მოძრაობასთან" ვერ გეტყვით, რაღაც მოლაპარაკებები ჰქონდათ ერთმანეთში და შეიძლება რაღაცაზე ვერ შეთანხმდნენ. რა თქმა უნდა, ვწუხვარ, რადგან ნებისმიერი დანაკლისი გაერთიანებიდან დანაკლისია, მაგრამ ეს დანაკლისი არ არის არაანაზღაურებადი. ჩვენ ველოდებით დამატებას სხვა პოლიტიკური სუბიექტების. ვინც დავრჩით, ვინარჩუნებთ ერთიანობას და სრულიად დარწმუნებულები ვართ იმაში, რომ ყველაზე მეტ ხმას მოვაგროვებთ“, - განაცხადა მამუკა გამყრელიძემ.
შეგახსენებთ, რომ დღეს "ახალი საქართველოს" ლიდერმა გიორგი ვაშაძემ და პარტია "კანონი და სამართალის" დამფუძნებელმა თაკო ჩარკვიანმა კოალიცია "ძალა ერთობაშია" დატოვეს. მათ ახალი კოალიცია "სტრატეგია აღმაშენებელი" დააარსეს.
