2011 წლიდან ქართველი გადამზიდველები თურქეთის ტერიტორიაზე შესვლას შეუზღუდავად შეძლებენ. შეზღუდვა აღარ იარსებებს როგორც დატვირთულ, ასევე დაუტვირთავ სატრანსპორტო საშუალებებზე.
შეზღუდვები აღარ იქნება ასევე ტვირთის აღებას და მის შემოტანაზე საქართველოში, ასევე გატანას თურქეთიდან მესამე ქვეყანაში და პირიქით.
ერთიანი სატრანსპორტო ადმინისტრაციის ინფორმაციით, შემოღებული იქნება მრავალჯერადი ნებართვების ახალი სისტემა, რომელიც საქართველოს ჯერ არც ერთ ქვეყანასთან არა აქვს ამოქმედებული. იგი გადამზიდველს საშუალებას აძლევს ერთხელ აიღოს ორმხრივი ნებართვა და გამოიყენოს იგი მრავალჯერ, მთელი წლის განმავლობაში.
იმავდროულად საქართველოსა და თურქეთს შორის მრავალჯერადი შესვლა/გამოსვლის სანებართვო სისტემა უნდა ჩამოყალიბდეს, რომელიც 2011 წლიდან ამოქმედდება. ნებართვა იქნება გაცემული ერთი წლის ვადით.
საერთაშორისო რეგულარული მგზართა ტრანსპორტირების შემდგომი სტიმულირების მიზნით მხარეებმა დაადგინეს, რომ კომპეტენტური წარმომადგენლები გაცვლიან ინფორმაციას წერილობითი ფორმით (გადამზიდველის დასახელება და განრიგი) იმ კომპანიებზე, რომლებიც ფლობენ საერთაშორისო რეგულარული მგზართა ტრანსპორტირების ნებართვებს და ისინი ქმედუნარიანი იქნება ორივე ქვეყნის ტერიტორიაზე მგზავრთა ტრანზიტული გადაყვანისას.
საქართველოს მოთხოვნის საფუძველზე თურქეთის მხრიდან საჭირო დახმარება იქნება უზრუნველყოფილი მგზავრთა ტერმინალის მშენებლობისა და მგზავრთა გადაყვანის გაუმჯობესებისათვის.
მხარეებმა პოზიტიურად აღნიშნეს სატრანსპორტო საშუალების აწონვის სერთიფიკატის ორმხრივი აღიარების შესახებ მხარეთა პოზიციების თანხვედრა და გადაწყვიტეს, რომ შეატყობინონ ერთმანეთს ამ საკითხის შესწავლის შედეგები.
