მიხეილ სააკაშვილი: ამერიკული ხორბალი 2013 წლისთვის საქართველოს ხორბლით მოთხოვნის 35-40% უზრუნველყოფს. ამის შესახებ საქართველოს პრეზიდენტმა მიხეილ სააკაშვილმა ყვარელში ფერმერებთან და აგრონომებთან შეხვედრისას განაცხადა.
მისი თქმით, ამერიკული ხორბალი მინიმუმ ორჯერ ზრდის მოსავალს და რამდენიმე წელში ოთხჯერ მეტი მოსავალი გვექნება.
"პირველ რიგში ჩვენ უნდა ვისწავლოთ ახალი მეთოდებით მუშაობა და პირველი ეს არის მეთესლეობა. ის რაც ჩვენ გვგონია, რომ მამა-პაპურია და კარგად ნასწავლია, რეალურად მოძველებულია. ჩვენ 100% -ს ვერ გავაკეთებთ, მაგრამ მუდმივად რომ ვიყოთ კანკალის პოზაში, რა მოხდება მსოფლიო ბაზარზე, სად ხანძარი გაჩნდება, სად შტორმი, ამით ჩვენ შეიძლება მშივრები დავრჩეთ. მუდმივად არ უნდა ვიყოთ მსხვერპლის და მაჩანჩალის როლში. თუ იზრდება ფასები ის მაინც უნდა გავაკეთოთ, რომ ჩვენ მოვიყვანოთ ხორბალი და სიმინდი და ამით მივიღოთ მეტი შემოსავალი," - აღნიშნავს სააკაშვილი.
მისი განმარტებით, ფერმერებმა და აგრონომებმა წელს უნდა ისწავლონ ახალი თესლის გამოყენება. მისი თქმით, ამ თესლმა შიდა ქართლში კარგად იმუშავა, ხალხი მიხვდა ამ სარგებელს და კი არ შეჭამა, არამედ მეორედ გამოიყენა.