ბუტა რობაქიძის დედის ია მეტრეველის განცხადებით, ირაკლი ოქრუაშვილი პასუხისმგებლობის თავიდან აცილებას ვერ შეძლებს.
ია მეტრეველის თქმით, ოჯახი პირველივე დღიდან მოითხოვდა ირაკლი ოქრუაშვილის პასუხისგებაში მიცემას, რადგან ის მაშინ შინაგან საქმეთა მინისტრი იყო.
"მათი სიტყვები იყო, რომ პატრულის იმიჯი არ უნდა შელახულიყო. ეს გადაწყვეტილება სააკაშვილმა და ოქრუაშვილმა ერთობლივად მიიღეს. ოქრუაშვილი პასუხისმგებლობას ვერ აირიდებს, ვერ გაექცევა იმ ფაქტს, რომ იმ პერიოდში იყო მინისტრი. იმედი მაქვს, რომ სასამართლო იქნება სამართლიანი,"- განაცხადა ია მეტრეველმა.
ცნობისთვის, ბუტა რობაქიძის საქმეზე დღეს ირაკლი ოქრუაშვილის სასამართლო პროცესი გაიმართება. შინაგან საქმეთა ყოფილ მინისტრსა და ზურაბ ადეიშვილს რობაქიძის საქმეზე უფლებამოსილების ბოროტად გამოყენებას ედავებიან. მათ ბრალი ხანდაზმულობის გასვლამდე რამდენიმე დღით ადრე, 2019 წლის ნოემბერში წაუყენეს. ოპოზიციურ პარტიებში მიაჩნიათ, რომ ოქრუაშვილთან მიმართებაში ბიძინა ივანიშვილს პირადი პრობლემა აქვს და სწორედ ამის გამო, ქვეყნის ოლიგარქი 8 მარტის შეთანხმებას არღვევს. ისინი აღნიშნავენ, რომ დოკუმენტი პოლიტპატიმრების გათავისუფლებასთან ერთად, ამ ტიპის საქმეების შეჩერებასაც ითვალისწინებდა.
