დღევანდელობის უმთავრესი ამოცანა არის პროგრესი და მოდერნიზაცია, _ განაცხადა საქართველოს პრეზიდენტმა მიხეილ სააკაშვილმა მცხეთაში სვეტიცხოვლობის დღესასწაულთან დაკავშირებით გამართულ კონცერტზე სიტყვით გამოსვლისას.
"უყურებ სვეტიცხოვლის წარმოუდენელ, ზღაპრულ არქიტექტურას და ხვდები, რომ მცხეთა არის სიმბოლო ჩვენი ერის მუდმივი სწრაფვისა სრულყოფილებისა და განვითარებისკენ. ამიტომაც არის, რომ ჩვენი დღევანდელობის უმთავრესი ამოცანა არის პროგრესი და მოდერნიზაცია. ამისთვის ვავთარებთ ქვეყნის ინფრასტრუქტურას", _ განაცხადა პრეზიდენტმა და აღნიშნა, რომ უახლოეს მომავალში აზერბაიჯანთან ერთად ახლაქალაქში გაკეთებული ერთობლივი სადგურისა და სარკინიგზო ქსელის შემდეგ დავიწყებული და მიტოვებული საქართველოს კუთხე ხელახლა აღორძინდება და განავითარებს იმ გზებთან ერთად, რომლის გახსნაც ამ კვირაში იგეგმება.
პრეზიდენტის თქმით, იქმნება ისეთ ეკონომიკური მოდელი, რომელიც ხალხის ცხოვრების არა მარტო დღევანდელ შემსუბუქებას ისახავს მიზნად, არა მარტო დღევანდელ სამუშაო ადგილების გაჩენას, "ასევე უყრის საფუძველს იმას, რომ საქართველო 21-ე საუკუნეს ერთი ნაბიჯით მაინც წინ უსწრებდეს. ჩვენი ქვეყანა იყოს კონკურენტუნარიანი და არა მოჩანჩალე თანამედროვე მსოფლიოში".
"მიუხედავად უზარმაზარი ეკონომიკური სიძნელებისა, მაიც შევინარჩუნოთ მიმზიდევლობა იმ ხალხისთვის, ვისაც ქვეყნის ეკონომიკური განვითარება უნდა, რომ ჩვენ ქვეყანა იყოს ბიზნესის კეთების სიმარტივის, დაბალი გადასახადების, მარტივი ეკონომიკური პროცედურებისა და გახსნილი ეკონომიკის ერთ-ერთი ყველაზე მიმზიდველი კუნძული რეგიონსა და მთელს მსოფლიოში", _ განაცხადა პრეზიდენტმა.
შეგახსენებთ, რომ დღეს სვეტიცხოვლის ტაძრის დაარსებიდან 1700 და განახლებიდან 1000 წლისთავი აღინიშნება. საქართველოს აღნიშნულთან დაკავშირებით კათოლიკოს-პატრიარქმა საზეიმო წირვა-ლოცვა აღავლინა, რომელსაც სხვადასხვა ქვეყნის, მათ შორის, რუსეთის მართლმადიდებლური ეკლესიების დელეგაციები დაესწრო.
