რაც შენდება დარჩება ისე, როგორც ეს ტაძარი და ვერც ერთი მთავრობა თან ვერ წიღებს, _ განაცხადა საქართველოს პრეზიდენტმა მიხეილ სააკაშვილმა მცხეთაში სვეტიცხოვლობის დღესასწაულთან დაკავშირებით გამართულ კონცერტზე სიტყვით გამოსვლისას.
პრეზიდენტმა სრულიადსაქართველოს სვეტიცხოვლობა მიიულოცა და აღნიშნა, რომ სვეტიცხოვლობა მსოფლიო მასშტაბის ზეიმია, რადგან საქართველო ზეიმობს ქრიასტიანობის ერთ-ერთი ყველაზე დიდი სიწმინდის, სვეტიცხოვლის დაფუძნების 1700 წლისა და განახლების 1000 წლისთავს.
"ამოვიარე ქუჩებში, რომლებიც მთლიანად განახლდა. ჩვენ დავკარგეთ ათწლეულები და ხშირად ვფიქრობ იმაზე, რომ მთავრობები გამოიცვლებიან, მაგრამ ვერც ერთი მთავრობა თან ვერ წიღებს იმას, რაც შენდება და კეთდება. ეს დარჩება ისევე, როგორც ეს ტაძარი. შეუძლებელია იყო მცხეთაში და არ ჩაფიქრდე იმაზე, რას გვასწავლის ჩვენი ისტორია, რანი ვართ, საიდან მოვდივართ, რა გზა გამოგვივლია, როგორც ერს და საით მივდივართ", _ აღნიშნა პრეზიდენტმა.
