ჯარიმების ჩამოწერა საკანონმდებლო ორგანოს პრეროგატივაა. ამის შესახებ საქართველოს პრემიერ-მინისტრმა გიორგი გახარიამ პარლამენტში განაცხადა, სადაც Covid-19-ის პანდემიის პირობებში, საგანგებო მდგომარეობის დროს მთავრობის მიერ განხორციელებული ღონისძიებების შესახებ ანგარიში წარადგინა.
მისი თქმით, ჯარიმების ჩამოწერასთან დაკავშირებით, აღმასრულებელი ხელისუფლებას პარლამენტს ვერანაირ მითითებას, მით უმეტეს დირექტიულს ვერ მისცემს.
"ჯარიმა აღმასრულებელი ხელისუფლებისთვის იყო შემაკავებელი ინსტრუმენტი. ჩვენ ეს შემაკავებელი ინსტრუმენტი საკმაოდ ეფექტურად გამოვიყენეთ, განსაკუთრებით მას შემდეგ, რაც რეკომენდაციებმა ეფექტურად არ იმუშავა. მინდა გითხრათ, რომ დაჯარიმებული მოქალაქეების რაოდენობა, რომლებმაც დაარღვიეს სხვდასხვა სახის სერიოზული შეზღუდვა საგანგებო მდგომარეობის დროს, იყო 9 000.
არ უნდა დაგვავიწყდეს, რომ პანდემია გრძელდება. არავინ იცის ასეთი შეზღუდვების გამოყენება როდის და რა მოცემულობით მოგვიწევს. ამიტომ აღმასრულებელი ხელისუფლების პასუხისმგებლობა მდგომარეობს იმაში, რომ ჩვენ ვერავის მოვუწოდებთ ამ ჯარიმების გაუქმებას. ეს ყველას უნდა გვესმოდეს, რამეთუ შემდგომ ამ ინსტრუმენტების შემაკავებელი ძალა არ იმუშავებს. მესმის, რომ ჯარიმების გარკვეული ნაწილი შემდგომისთვის გადასახედია და ჩვენ ამას გავაკეთებთ. თუმცა, ეს საკანონმდებლო ორგანოს პრეროგატივაა და ჩვენ აქ პარლამენტს ვერანაირ მითითებას მით უმეტეს დირექტიულს ვერ მივცემთ", - განაცხადა გახარიამ.
შეგახსენებთ, საგანგებო მდგომარეობის რეჟიმისა და კომენდანტის საათის დარღვევისთვის გათვალისწინებული იყო ჯარიმა ფიზიკური პირებისთვის 3 000 ლარის ოდენობით, ხოლო იურიდიული პირებისთვის 15 000 ლარის ოდენობით.