ქობულეთში თავისუფალი ტურისტული ზონის განვითარებისათვის მიწის ნაკვეთის უფასოდ გამოყოფის ზედა ზღვარი შემცირდა. ამის შესახებ განცხადება მთავრობის საპარლამენტო მდივანმა გია ხუროშვილმა დღეს პარლამენტში დარგობრივი ეკონომიკის კომიტეტის სხდომაზე აღნიშნული კანონპროექტის მეორე მოსმენით განხილვისას გააკეთა.
შეგახსენებთ, რომ კანონპროექტის თავდაპირველი ვარიანტით თითო ნაკვეთი განსაზღვრული იყო 3, 5 ჰექტარი ტერიტორიის ოდენობით, რომელიც უფასოდ უნდა გადაეცეს ინვესტორს, იმ შემთხვევაში, თუკი იგი მინიმუმ 1 მილიონი ლარის ღირებულების ინვესტიციას განახორციელებს. ამასთან, იგი გათავისუფლდება 15 წლის განმავლობაში მოგებისა და ქონების გადასახადისგან.
უფასოდ გამოსაყოფი ტერიტორიის ოდენობა კი საკითხის პირველი მოსმენით სესიაზე განხილვისას საპარლამენტო უმრავლესობის წარმომადგენელმა თამაზ დიასამიძემ გააპროტესტა. როგორც მან აღნიშნა, ეს რაოდენობა იყო "ულოგიკოდ დიდი".
ხუროშვილმა კი დღეს კომიტეტის სხდომაზე განაცხადა, რომ მთავრობამ აღნიშნულ საკითხზე იმსჯელა და დიასამიძის მოთხოვნა გაითვალისწინა. შესაბამისად, 3,5 ჰექტარი შემცირდება 0,2 ჰექტარამდე, ანუ უფასოდ გადასაცემი თითოეული მიწის ნაკვეთის ფართი იქნება 2 ათასი კვადრატული მეტრი.
მთავრობის ამ ინიციატივას დარგობრივი ეკონომიკის კომიტეტი ერთხმად უჭერს მხარს.
