საქართველოს უზენაეს სასამართლოში სასამართლო მენეჯერებს სერთიფიკატები გადაეცა.
ღონისძიება უზენაესი სასამართლოს თავმჯდომარემ კონსტანტინე კუბლაშვილმა გახსნა და სასამართლო სისტემაში ამ ახალი რგოლის მნიშვნელობაზე ისაუბრა.
ღონისძიებას ასევე დაესწრო და სასამართლო მენეჯერებს სიტყვით მიმართა USAID-ის მისიის დირექტორმა საქართველოში, ჯოქ კონლმა.
სასამართლოს მენეჯერებს სერთიფიკატები გადაეცათ სასამართლოს მენეჯმენტის კუთხით სხვადასხვა სასწავლო დისციპლინების წარმატებით გავლის შედეგად.
სასამართლო ადმინისტრირებისა და მენეჯმენტის რეფორმის პროექტის ფარგლებში საქართველოში განვითარდა სასამართლოს მენეჯერის ინსტიტუტი.
აღნიშნული მიზნის მიღწევის თვალსაზრისით გატარდა მთელი რიგი ღონისძიებები და, შედეგად სასამართლოს მენეჯერის თანამდებობა განისაზღვრა "საერთო სასამართლოების შესახებ" საქართველოს ორგანული კანონით.
შემუშავდა სასამართლოს მენეჯერის სამუშაო აღწერილობა და პროფესიონალად მომზადების სასწავლო პროგრამა.
სასამართლო მენეჯერების მომზადების შემდეგი ეტაპი 2011 წლის გაზაფხულისთვის არის დაგეგმილი.
ყოველივე აღნიშნული ემსახურება საერთო სასამართლოებში მენეჯმენტის განვითარებას და ამისათვის პროფესიული რგოლის შექმნას. სასამართლო მენეჯერები იზრუნებენ სასამართლოებში მომსახურების სტანდარტის გაუმჯობესებისათვის.
ბოლო გამოკითხვების შედეგად, რომელიც სწორედ USAID-ის დაფინანსებით ჩატარდა, გამოკითხული რესპონდენტების 71,20 პროცენტი კმაყოფილია სასამართლოს მომსახურებით, ხოლო 63,20 პროცენტი აცხადებს, რომ ენდობა სასამართლოს
