ტურიზმის ეროვნული ადმინისტრაციის ხელმძღვანელი მომავლის ტურიზმს უწოდებს იმ გამოცდილებას, რომელიც საქართველომ პანდემიის გავრცელების პირობებში შეიძინა და დანერგა. ეს კარანტინების მართვის პროექტია.
მარიამ ქვრივიშვილმა გადაცემა “ბიზნესპარტნიორის ოთხეულში” განაცხადა, რომ საქართველოს ამ თვალსაზრისით კონკურენტუნარიანი პოზიცია აქვს.
“მთელი მსოფლიოს მასშტაბით გვაქვს კარანტინების პროექტის მართვის უნიკალური გამოცდილება და უკვე 2 თვეა ტურიზმის ინდუსტრია ექიმებთან ერთად COVID-თან ბრძოლის წინა ფრონტზეა. 83 სასტუმროში დასაქმებული მინიმუმ 2500 ადამიანი ჩართული იყო ამ ბრძოლაში და მთელი მსოფლიო როცა ახლა ფიქრობს და ჯერ არ არის ჩამოყალიბებული რას აპირებს, ჩვენ არათუ ჩამოყალიბებულები ვართ, არამედ უკვე 2 თვეა ამას პრაქტიკულად ვახორციელებთ. ეს არის ჯანდაცვის უმკაცრესი რეგულაციების დანერგვა დაწყებული სასტუმრო ნომრის დალაგებიდან უკონტაქტო სერვისის შეთავაზებით დამთავრებული (ეს არის კვების წარმოება-მიწოდება, დისტრიბუცია, ტრანსპორტირება) და ამაში ჩართული ყველა რგოლი, რომელიც რეალურად არის ხვალინდელი დღის ტურიზმი. ჩვენ უკვე შეგვიძლია თავს მივცეთ უფლება ვთქვათ, რომ დიახ, არათუ ეს გვაქვს, არამედ ეს უკვე დავნერგეთ და 20 000 ადამიანი გავატარეთ ამ მომსახურებაში, ეს არის ხვალინდელი დღის ტურიზმი”, – განაცხადა მარიამ ქვრივიშვილმა.
მისი თქმით, ამ შემთხვევაში საუბარი ეხება არა მხოლოდ ცნობილ და მსხვილ სასტუმრო ბრენდებს, არამედ რეგიონებში არსებულ 10-20-30-ნომრიან მცირე და საშუალო სასტუმროებს. შესაბამისად, როგორც ქვრივიშვილი ამბობს, ინდუსტრიული ცნობიერება და პრაქტიკაში დანერგილი ეფექტური მართვის შედეგად, საქართველო თავის ნოუ-ჰაუს უზიარებს მსოფლიო ანტიკრიზისულ გეგმაზე მომუშავე სამუშაო ჯგუფს.
მარიამ ქვრივიშვილმა ასევე ისაუბრა უსაფრთხოების დერეფნების ამოქმედების მნიშვნელობაზე. ამ შემთხვევაში საუბარია სასაზღვრო გამშვებ პუნქტებზე უსაფრთხოების ნორმების დანერგვას გულისხმობს.