დიდი მესიჯია, როდესაც მსოფლიოს ტურიზმის ორგანიზაცია (UNWTO) პანდემიიდან ასეთ მოკლე პერიოდში, გადაწყვეტს, ტურიზმის, ტრანსპორტისა თუ ეკონომიკის მინისტრები გაამგზავროს ერთ პატარა ქვეყანაში, საქართველოში, რომელსაც აქვს ძალიან დიდი წარმატების ფორმულა უსაფრთხოების ნაწილში, – ამის შესახებ ტურიზმის ეროვნული ადმინისტრაციის ხელმძღვანელმა გადაცემა “ბიზნესპარტნიორის ოთხეულში” განაცხადა.
მარიამ ქვრივიშვილის თქმით, საქართველოს მსოფლიო ტურიზმის ორგანიზაციასთან, რომელიც ქმნის მსოფლიო ტურიზმის ინდუსტრიის პოლიტიკას, ყოველდღიურ რეჟიმში აქვს კომუნიკაცია.
“მადლიერები ვართ იმ ძალიან პოზიტიური შეფასების, რომელიც მსოფლიო ტურიზმის საერთაშორისო ორგანიზაციამ არაერთხელ საჯაროდ დააფიქსირა. ჩვენ რამდენიმე დღის წინ გვქონდა პრემიერთან ერთად ვიდეოზარი უშუალოდ ტურიზმის ორგანიზაციის ხელმძღვანელთან და შევთანხმდით, რომ საქართველო იქნება ის პირველი ქვეყანა, სადაც მაღალი რანგის საერთაშორისო ღონისძიება, ტურიზმის მინისტერიალი ჩატარდება. მანამდე რა თქმა უნდა იყო შეთანხმება, რომ მინისტერიალი საქართველოში ივნისში უნდა ჩატარებულიყო, თუმცა ნამდვილად ძალიან დიდი მესიჯია, რომ პანდემიიდან ძალიან მოკლე ხანში, სექტემბერში მინისტერიალი გაიმართება საქართველოში”, – განაცხადა მარიამ ქვრივიშვილმა.
