ისრაელის ავიახაზები მზადაა დაბრუნდეს საქართველოს საჰაერო სივრცეში, – ამის შესახებ ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა გადაცემა “ბიზნესპარტნიორის ოთხეულში” განაცხადა.
მისი თქმით, ისრაელის ელჩმა საქართველოში უკვე საჯაროდ განაცხადა, რომ საქართველოსა და ისრაელს შორის მოლაპარაკებები მნიშვნელოვან ეტაპზეა.
“ისრაელი ყოველთვის იყო ჩვენი ერთ-ერთი ძალიან სტრატეგიული პარტნიორი მეგობარი ქვეყანა, როდესაც ტურიზმზე ვსაუბრობთ და არა მხოლოდ. აღსანიშნავია, რომ ისრაელის ეროვნული ავიხაზები მზადაა დაბრუნდეს საქართველოს საჰაერო სივრცეში. მეორე მხრივ, ეს მნიშვნელოვანი, პოზიტიური გზავნილია მთელი მსოფლიოსთვის, რამდენადაც ყველამ ვიცით კონკრეტულად ისრაელი რამხელა მნიშვნელობას ანიჭებს უსაფრთხოებას, ნორმების დაცვას და ამ შემთხვევაში ეს აქვს საქართველოს”, – განაცხადა მარიამ ქვრივიშვილმა.
ტურიზმის ეროვნული ადმინისტრაციის ხელმძღვანელი სხვა დეტალებზე არ საუბრობს სხვადასხვა ქვეყნის პროტოკოლიდან გამომდინარე. იმავდროულად ქვრივიშვილი აღნიშნავს 36 ავიაკომპანიიდან 18-ის მზაობაზე ფრენების აღდგენასთან დაკავშირებით. “ეს არის მინიმუმ 18 მიმართულება, რომელიც ჩვენ ქვეყანას პირდაპირი საჰაერო მიმოსვლით ემატება, რაც ნიშნავს კიდევ უფრო მეტ კავშირს ტრანზიტულ ქვეყნებთან”, – განაცხადა ქვრივიშვილმა.
მარიამ ქვრივიშვილმა საქართველოს მიერ კოვიდის გამოწვევებთან წარმატებულ გამკლავების მნიშვნელობაზე აღნიშნა და განმარტა, რომ ეს პირველ რიგში ეხმარება ტურიზმის ინდუსტრიას და ზოგადად ქვეყნის სწორ პოზიციონირებას საერთაშორისო არეალზე, მეორე მხრივ, კი საქართველომ განაცხადა, რომ არის პირველი ქვეყანა, რომელის ხსნის საზღვრებს.
მარიამ ქვრივიშვილის თქმით, ეს ძალიან ბევრი ქვეყნისთვის იყო პოზიტიური ინიციატივა.”ეს ნიშნავს, რომ ჩვენ მარტონი არ ვართ და ყველა ის სტრატეგიული სამიზნე ქვეყანა, რომელიც ჩვენთვის ტრადიციულად იყო საინტერესო ან გვინდოდა უფრო მეტი ბაზრის წილის აღება, ჩვენ მოლაპარაკებების ფარგლებში, რომელიც გულისხმობს უსაფრთხო დერეფნების ფორმატით თანაშრომლობას, უკვე მიდის ძალიან პოზიტიური ტრენდით”, – განაცხადა გადაცემაში ტურიზმის ეროვნული ადმინისტრაციის ხელმძღვანელმა.
