მსოფლიო ტურიზმის ორგანიზაცია დადასტურებულ რეკომენდირებულ ნორმებს ტურიზმის სექტორისთვის 25 მაისს წარადგენს, – ამის შესახებ გადაცემა „ბიზნესპარტნიორის ოთხეულში“ ტურიზმის ეროვნული ადმინისტრაციის ხელმძღვანელმა განაცხადა.
მარიამ ქვრივიშვილის თქმით, რომ საქართველოსთვის ეს ძალიან მნიშვნელოვანია, თუმცა მეორე მხრივ საქართველოს უკვე აქვს შემუშავებული ნორმები და იმედოვნებს, რომ ეს გაიდლაინები დიდად განსხვავებული არ იქნება მსოფლიო ტურიზმის ორგანიზაციის ნორმებისგან.
“ერთიან სამუშაო ჯგუფში, რომელიც მსოფლიო ტურიზმის ორგანიზაციამ შექმნა და რომელიც მუშაობს მსოფლიო ტურიზმის ანტიკრიზისულ გეგმაზე საქართველოც არის წარდგენილი. ამაყები ვართ, რომ საქართველო ჩათვალეს ღირსად, ყოფილიყო ამ ჯგუფის წევრი და ზუსტად ჩვენი ნოუ-ჰაუს (კარანტინების მართვის პროექტი) გაზიარება ხდება ამ მიმართულებით.
მეორე მხრივ ჩვენ უკვე გვაქვს შემუშავებული გაიდლაინები, რომელსაც მიმდინარე კვირაში გავივლით სექტორულად ინდუსტრიის წარმომადგენლებთან, ეპიდემიოლოგებთან და ჯანდაცვის სამინისტროსთან.
გეგმა შემუშავებული გვაქვს ყველა სექტორისთვის, იქნება ეს გიდებისთვს, ტურისტული კომპანიებისთვის, სასტუმროებისა თუ სატრანსპორტო მიმართულებით. ჩვენ ამ საკითხზე ვიმსჯელებთ ინდუსტრიის წარმომადგენლებთან, მივიღებთ მათგან რეკომენდაციებს მიმდინარე კვირის განმავლობაში და დავიწყებთ იმპლემენტაციას, რადგან ვიცით, რომ ის არ იქნება განსხვავებული მსოფლიო ტურიზმის ორგანიზაციის ნორმებისგან”, – განაცხადა მარიამ ქვრივიშვილმა.