მთავრობა და ტურიზმის ეროვნული ადმინისტრაცია ტურიზმის სექტორში შემავალი ყველა რგოლისთვის იმ წესების შემუშავებაზე მუშაობს, რაც ხელს შეუწყობს ერთის მხრივ დარგის "აღდგენას", ხოლო მეორე მხრივ გამოყენებული იქნება COVID-19-ის წინააღმდეგ საბრძოლველად. ტურიზმის ეროვნული ადმინისტრაციის ხელმძღვანელი განმარტავს, რომ ტურიზმის ინდუსტრიაში შემავალი ძალიან მნიშვნელოვანი 6 რგოლისთვის ახალ წესებზე მუშაობა თითქმის დასრულებულია.
"ჩვენ ვგეგმავთ, რომ მიმდინარე კვირა სრულებით დავუთმოთ ეპიდემიოლოგებთან, ჯანდაცვის სამინისტროსა და ასევე ჩვენ კერძო სექტორთან აღნიშნულის გავლასა და დამტკიცებას. მნიშვნელოვანია ხაზი გავუსვათ, რომ დაახლოებით 25 მაისისთვის ჩვენ მსოფლიო ტურიზმის ორგანიზაციისგან ასევე მივიღებთ საერთაშორისოდ აღიარებულ სტანდარტებს, რომლის მოდიფიკაციაც მერე მოხდება საქართველოს რეალობაში.
სანამ მესამე ეტაპის დახმარების პაკეტს წარმოვადგენდით სრულებით ყველა ინდუსტრიის წარმომადგენელთან გვქონდა პირდაპირი დიალოგი, ესენი იყვნენ: მცირე, საშუალო თუ დიდი ზომის სასტუმროები, გიდები, ტურისტული კომპანიები და კვების ობიექტები. შესაბამისად ჩვენ პირველ რიგში მათგან მოვისმინეთ თუ რა მდგომარეობა აქვთ და რა სჭირდებათ იმისათვის, რომ განაგრძონ ოპერირება და მეორეს მხრივ რა სჭირდებათ იმისათვის რომ შეინარჩუნონ ის დასაქმების ადგილები რომლებსაც წლის განმავლობაში ქმნიდნენ.
მათი უკუკავშირი იყო ჩვენთვის ის ბაზა რის მიხედვითაც ავაწყვეთ ის დახმარების პაკეტი, რომელიც წარმოვადგინეთ გასულ კვირას. შეგვიძლია ვთქვათ, რომ ეს დახმარების პაკეტი ბოლომდე პასუხობს ჩვენი კერძო სექტორის თხოვნებს და იმ უკუკავშირს რომელიც ჩვენ მივიღეთ. ეს არის პრაქტიკა, როგორ მუშაობს ტურიზმის ეროვნული ადმინისტრაცია, ეკონომიკის სამინისტრო მუდმივად რადგან ყველაფერი ის რაც კეთდება რა თქმა უნდა კერძო სექტორის გაძლიერებისთვის და იმისათვის, რომ არ დაიკარგოს დასაქმების ადგილები. ჩვენ გვქონდა უკუკავშირი და საუბარი კერძო სექტორთან, ყველა წარმომადგენელთან ამ ეტაპისთვის გვაქვს ძალიან პოზიტიური შეფასება რადგან, სასტუმროების ნაწილზე რომ ვისაუბროთ მათი ყველაზე დიდი ტვირთია ქონების გადასახადი ისევე როგორც სესხის პროცენტი. როგორც მოგეხსენებათ საშემოსავლო გადასახადი მათ გადაუვადდათ წლის ბოლომდე, მოხდება სესხის პროცენტის სუბსიდირება. ფაქტობრივად მიმდინარე ხარჯები მათი ტკივილი აღარ არის და შესაბამისად ჩვენ იმედს ვიტოვებთ, რომ 15 ივნისისთვის და 1-ელი ივლისისთვის სასტუმროები სრულ მზადყოფნაში იქნებიან იმისათვის, რომ გააგრძელონ კომერციული საქმიანობა", განაცხადა მარიამ ქვრივიშვილმა რუსთავი 2-ის ეთერში სტუმრობისას.