საქართველოს, რომელიც ტურიზმის განვითარების მიმართულებით ძალიან აქტიური იყო, სამწუხაროდ COVID-19-ის გავრცელების ფონზე ქვეყნის ტურიზმი, ისევე როგორც მთელი მსოფლიოს ტურიზმის ინდუსტრია, საკმაოდ დაზარალდა, განაცხადა ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა. რუსთავი 2-ის ეთერში სტუმრობისას მარიამ ქვრივიშვილმა განმარტა, რომ ტურიზმს თავისი დიდი ღირებულება აქვს, რაც არის ეკონომიკური სარგებლის შექმნა და ძალიან ბევრი ადამიანის დასაქმების თუ შემოსავლის გენერირების საშუალება. სწორედ ამიტომ დარგის გადასარჩენად შექმნილია ტურიზმის ამოქმედების ანტიკრიზისული გეგმა, რომელიც ამ ბიზნესში ჩართული სუბიექტებისათვის გარკვეულ შეღავათებს ითვალისწინებს.
"გასულ კვირას პრემიერ-მინისტრმა განაცხადა, რომ ტურიზმის ინდუსტრია საქართველოში უნდა დაუბრუნდეს ჩვეულ და კიდევ უფრო მეტად გაძლიერებულ ფორმას.
ჩვენ ძალიან ამაყები ვართ, რომ საქართველო არის მგონი პირველი და არა ერთ-ერთი ქვეყანა რომელმაც თამამად განაცხადა, რომ გახსნის საზღვრებს და კონკრეტული თარიღი დაასახელა, რომელიც არის 1 ივლისი.
რაც შეეხება შიდა ტურიზმს ბუნებრივია, რომ ლოგიკურია ჩვენ მანამდე დავიწყოთ შიდა ტურისტული აქტივობები, სანამ გავხსნით საზღვრებს საერთაშორისო მოგზაურებისთვის. შიდა ტურიზმს თავისი ღირებულება ჰქონდა მუდმივად ჩვენი ქვეყნის ეკონომიკაში, რადგან იყვნენ საკმაოდ ბევრი ადამიანები, საქართველოს მოქალაქეები, რომლებსაც ჰქონდათ სურვილი წლიდან წლამდე, რომ ემოგზაურათ საქართველოში. ეს ბუნებრივია, რომ არ უნდა წარმოვიდგინოთ როგორც ჩამანაცვლებელი საერთაშორისო მოგზაურების.
საქართველოში ძალიან დივერსიფიცირებული გვაქვს სასტუმროების ლოკაციები და ინვესტორები უკვე თვალს ადევნებდნენ იმ რეგიონალურ განვითარებას, რაც ინფრასტრუქტის და ტურისტული ნაკადების გაზრდასთან მიმართებაში იყო ჩვენ ქვეყანაში, შესაბამისად სასტუმროები საკმაოდ ბევრია და რაც მნიშვნელოვანია ეს არ არის მხოლოდ მჭიდროდ და მობილიზებული დედაქალაქში, თუმცა რათქმაუნდა დედაქალაქი ძალიან აქტიური იყო ტურისტულად,
2019 იყო პირველი წელი როდესაც, მაგალითად აჭარა გახდა ნომერ პირველი ტურისტული ვიზიტების მქონე მიმართულება რეგიონალურ ჭრილში მთელი საქართველოს მასშტაბით", აღნიშნა განვლილი პერიოდის მიმოხილვისას მარიამ ქვრივიშვილმა.
