კორონავირუსმა შესაძლოა, გრძელვადიან პერსპექტივაში დატოვოს კვალი სასუნთქი სისტემის ან სხვა ორგანოთა სისტემის დაზიანების მხრივ. ამის შესახებ თბილისის შიდსისა და ინფექციური პათოლოგიების ცენტრის გენერალურმა დირექტორმა, თენგიზ ცერცვაძემ "პირველი არხის" საინფორმაციო გამოშვებაში "მოამბე" განაცხადა.
"ესეც ამ დაავადების ერთ-ერთი ვერაგი თავისებურებაა, რაც თავიდან არ ვიცოდით. თავიდან ვფიქრობდით, რომ ეს ჩვეულებრივი ვირუსული პნევმონიაა, რომ მთავარია ავადმყოფი არ დაგეღუპოს და თუ ის გადარჩება, აბსოლუტურად გაჯანმრთელებული იქნება. ახლა გამოჩნდა კვლევის შედეგები, ჯერ ეს დადასტურებული არ არის, მაგრამ ამბობს, რომ შესაძლებელია ამ დაავადებამ დატოვოს კვალი გრძელვადიან პერსპექტივაში სასუნთქი სისტემის ან არამარტო სასუნთქი სისტემის, სხვა ორგანოთა სისტემის დაზიანების მხრივაც. თუმცა ჯერ ეს მხოლოდ პირველი შედეგებია და პირველი კვლევის ასეთი ვარაუდებია. ჯერ ეს დადასტურებული არ არის", - აცხადებს თენგიზ ცერცვაძე.
