ჩილეში მიწისქვეშ მოყოლილი მეშახტეების ევაკუაცია სავარაუდოდ ოთხშაბათს განხორციელდება. ამის შესახებ ჟურნალისტებთან საუბრისას ჩილეს შესაბამისი სამსახურის წარმომადგენლებმა განაცხადეს.
ჩილეს ოფიციალური პირების ინფორმაციით, საბურღმა მოწყობილობამ მეშახტეებამდე უკვე მიაღწია. მათი მიწის ზედაპირზე ამოყვანის პროცესი ოთხშაბათს დაიწყება და შაბათამდე 33 მეშახტის ევაკუაცია სრულად განხორციელდება. ამისათვის ჩილელი ინჟინრები საგანგებოდ დამზადებულ კაფსულას გამოიყენებენ, რომელშიც ერთი ადამიანი ეტევა და მისი ჯანმრთელობისათვის სრულიად უსაფრთხოა.
შეგახსენებთ, რომ სან ხოსეს მაღაროში ავარია 5 აგვისტოს დაფიქსირდა რის შემდეგაც მოხდა მაღაროს ბლოკირება და მიწისქვეშ აღმოჩნდა 33 მაღაროელი. დაზარალებულები მიწისქვეშ, დედამიწის ზედაპირიდან 700 მეტრით დაბლა იმყოფებიან. მათ საგანგებოდ გაჭრილი არხით საკვები, წყალი, თამბაქო, მედიკამენტები და სხვა საჭირო ნივთები მიეწოდებათ.
მასალის გამოყენების პირობები