იუსტიციის სამინისტროში ნაფიც მსაჯულთა თემაზე მრგვალი მაგიდა გაიმართა. დიკუსიაში მონაწილეობა მიიღებეს მოსამართლეებმა, პროკურორებმა, ადვოკატებმა, არასამთავრობო ორგანიზაციების წარმომადგენლებმა, საზოგადოებისთვის ცნობილმა ადამიანებმა და სტუდენტებმა.
როგორც ცნობილია, 1 ოქტომბრიდან საქართველოში ნაფიც მსაჯულთა სასამართლო ამოქმედდა. რაც იმას ნიშნავს, რომ საზოგადოების წარმომადგენლები, ნაფიც მსაჯულთა სახით უშუალოდ ჩაერთვებიან მართლმსაჯულების განხორციელებაში.
თავდაპირველად ნაფიც მსაჯულთა ინსტიტუტი მხოლოდ თბილისის მასშტაბით ამოქმედდება და დამამძიმებელ გარემოებებში განზრახ მკვლელობის საქმეებს შეეხება. ნაფიცი მსაჯულობა სამოქალაქო ვალდებულებაა და ყოველი კონკრეტული სხდომისთვის ნაფიცი მსაჯულები შემთხვევითი შერჩევის პრინციპის თანახმად შეირჩევიან.
ნაფიც მსაჯულთა სასამართლოზე მოსამართლეს პროცესის წამყვანის ფუნქცია დაეკისრება, გადაწყვეტილებას კი კონკრეტულ საქმესთან დაკავშირებით ნაფიცი მსაჯულები მოსამართლის ჩაურევლად მიიღებენ. ნაფიცები საქმის დასრულების შემდეგ იტყვიან, ბრალდებული დამნაშავეა თუ არა. მათ გადაწყვეტილების დასაბუთების ვალდებულება არ აკისრიათ.
ნაფიც მსაჯულთა ტრანსპორტირებისა და სხვა საჭირო ხარჯებს სახელმწიფო აუნაზღაურებს. დამქირავებელი, სადაც ნაფიცი მსაჯულია დასაქმებული, ვალდებულია, მას ხელი შეუწყოს დაკისრებული მოვალეობის შესრულებაში.
ორი წლის შემდეგ ნაფიც მსაჯულთა სასამართლო მთელ საქართველოში დაინერგება.
ნაფიც მსაჯულთა სასამართლო მართლმსაჯულების ყველა ფორმას შორის ტრადიციულად ყველაზე დემოკრატიულად ითვლება.
