სასწრაფოდ უნდა შეუჩერდეს სკოლას ლიცენზია, რისთვის აქვთ მანდატურის სამსახური. კედელზე წარწერების გამო, ბავშვი პოლიციისთვის რატომ გაიმეტეს, - ასე ეხმიანება 2004 წლის სპეცოპერაციის დროს მოკლული ბუტა რობაქიძის დედა, ია მეტრეველი 15 წლის მოზარდის გარდაცვალების ფაქტს.
„სასწრაფოდ უნდა იქნეს გამოძიებული რა მოხდა სინამდვილეში, იყო თუ არა მართლაც პროკურატურიდან ზეწოლა. ასევე სასწრაფოდ უნდა შეუჩერდეს სკოლას ლიცენზია, რისთვის აქვთ მანდატურის სამსახური. კედელზე წარწერების გამო, ბავშვი პოლიციისთვის რატომ გაიმეტეს, როგორც ირკვევა, ეგ სკოლაც ნაცების ყოფილა, სადაც ეგენი არიან, ყველგან სისხლი, სიკვდილი და ბოროტებაა, ნამდვილი სატანის მსახურები. სხვას ვერაფერს ვუწოდებ“, - ამბობს მეტრეველი.
15 წლის ლუკა სირაძემ თვითმკვლელობა 12 დეკემბერს სცადა. ის მე-9 სართულიდან გადმოხტა. შემთხვევას წინ უძღოდა „მწვანე სკოლაში“ მომხდარ ინციდენტთან დაკავშირებით მოზარდის პოლიციის განყოფილებაში მოწმის სახით დაკითხვა. მოზარდის ჯანმრთელობის მდგომარეობა, ექიმების შეფასებით უკიდურესად მძიმე იყო და 17 დეკემბერს გარდაიცვალა. მოზარდის გარდაცვალების შემდეგ, იმავე დღეს, სახელმწიფო ინსპექტორის აპარატმა დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი, ჩვენების მიცემის იძულების ბრალდებით დააკავა. დაკავებული გამომძიებელი ბრალდებას არ აღიარებს. მისთვის ჯერ ბრალი ოფიციალურად არ წარუდგენიათ.
