დავით საგანელიძე დედაქალაქში მდებარე კლინიკებისთვის ნორმალური სამუშაო პირობების შექმნას ითხოვს. "თბილისის ცენტრში მდებარე სამედიცინო დაწესებულებების უდიდესი ნაწილი, რომელთა შენობების პრივატიზებაც მოახდინა სახელმწიფომ და რომელთაც თითქოს პირდებოდნენ შესაბამისი პიროებების შექმნას, საბოლოოდ აღმოჩნდებიან შენობების გარეშე", განაცხადა ფრაქცია "ჩვენი თბილისის" თავმჯდომარემ დავით საგანელიძემ დღეს საკრებულოში გამართულ პრესკონფერენციაზე. მისივე თქმით, სახელმწიფომ იმ კლინიკებს, რომელთა არსებობის საკითხიც ამ ეტაპზე ეჭვქვეშ დგას, შენობები უსასყიდლოდ უნდა გადაეცეს.
საგანელიძემ მაგალითად ჟორდანიას სახელობის ადამიანის რეპროდუქციის ინსტიტუტი მოიყვანა და განმარტა, რომ კლინიკის არსებობა ეჭვქვეშ დადგა იმის გამო, რომ ხელისუფლება თავის დაპირებას არ ასრულებს. მისი მტკიცებით, შეთავაზებები, რომელიც ხელისუფლების მხრიდან აქვს ინსტიტუტს აბსოლუტურად მიუღებელია კოლექტივისთვის, რადგან პრაქტიკულად სახელმწიფო აპირებს უზარმაზარი საფასური გადაახდევინოს მათ ე.წ. რკინიგზის საავადმყოფოს გარემონტებულ ფართში, რისი საშუალებაც საგანელიძის თქმით, კოლექტივს არა აქვს.
"ირკვევა, რომ ისეთი მნიშვნელოვანი სამედიცინო დაწესებულების არსებობა როგორიცაა ჟორდანიას სახელობის ადამიანის რეპროდუქციის ინსტიტუტი, საუბარია ინსტიტუტზე, რომელიც უნიკალურია არა მარტო საქართველოში არამედ მთელს პოსტსაბჭოთა სივრცეში, სადაც ინვიტრო და რეპროდუქციის სხვა თანამედროვე საშუალებებით საშუალოდ დღეში 3-4 ბავშვი მოევლინება ქვეყანას, სადაც ტარდება უნიკალური ოპერაციები, რაც მთავარია, მიმდინარეობს მეცნიერული თვალსაზრისთ ძალზედ მნიშვნელოვანი კვლევები და ინერგება ინოვაციური მეთოდები. დემოგრაფიულად უმძიმეს მდგომარეობაში მყოფ ქვეყანაში ასეთი ინსტიტუტის ბედი არ შეიძლება სასწორზე იდოს და ბუნდოვნად ჩანდეს მისი არსებობის პერსპექტივა", - აღნიშნა საგანელიძემ და დასძინა, რომ ანალოგიურ სიტუაციაშია ჩხეიძის ქუჩაზე მდებარე ტრავმატოლოგიის ცენტრი, ომის ვეტერანთა ჰოსპიტალი, მეორე სამშობიარო სახლი და რამდენიმე სხვა მნიშვნელოვანი და დიდი ტრადიციების მქონე სამედიცინო დაწესებულება.
"მემარჯვენე" საგანელიძე აცხადებს, რომ დაუშვებელია ასეთი მიდგომა სამედიცინო დაწესებულებისადმი და დაუყოვნებლი მისაღებია ზომები ჟორდანიას სახელობის ადამიანის რეპროდუქციის ინსტიტუტის და სხვა კლინიკებისთვის ნორმალური პირობების შესაქმნელად. საგანელიძის განმარტებით, ამ სიტუაციაში გამოსავალი შეიძლება იყოს სახელმწიფოს მიერ ამ კლინიკებისთვის უსასყიდლოდ გადაცემა. მისი თქმით, წინასწარი გათვლებით ამისათვის დაახლოებით 5 მლნ. ლარი არის საკმარისი, "რაც სავსებით ხელმისაწვდომია თანხაა ქვეყნის ბიუჯეტისთვის". მანვე, ჯანდაცვის მინისტრს მოუწოდა საკრებულოს სხდომაზე მივიდეს და დეპუტატებს პრობლემის მოგვარების საკუთარი ხედვა გააცნოს.
"ვთავაზობთ ბატონ მინისტრს ანდრია ურუშაძეს დედაქალაქის საკრებულოს ჯანდაცვის კომისიის სხდომაზე სამედიცინო დაწესებულებების წარმომადგენლებთან ერთად გაგვიზიაროს თავის ხედვა შექმნილი სიტუაციიდან გამოსავალთან დაკავშირებით და კიდევ ერთხელ გამოვთქვამთ მზადყოფნის, მონაწილეობა მივიღოთ ჰოსპიტალური სექტორის რეორგანიზაციის პროცესში წარმოქმნილი პრობლემის მოგვარებაში", - განაცხადა საგანელიძემ.
