ნატოს სამეკავშირეო ოფისი ნატოს გენერალურმა მდივანმა ანდრეს ფოგ რასმუსენმა და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა გიორგი ბარამიძემ გახსნეს.
როგორც ბარამიძემ აღნიშნა, საქართველოში ალიანსის წარმომადგენლობის გახსნა დადასტურებაა იმ განსაკუთრებული ურთიერთობებისა, რაც ბუქარესტის სამიტის შემდეგ საქართველო-ნატოს შორის ჩამოყალიბდა.
"უნდა აღინიშნოს, რომ საქართველომ მნიშვნელოვან პროგრესს მიაღწია "საშინაო დავალების" შესრულებაში, კერძოდ კი, რეფორმების წარმატებით განხორციელებაში. განსაკუთრებით აღსანიშნავია მაისში ჩატარებული თვითმმართველობის არჩევნები, ვამაყობთ პოლიციის, თავდაცვის, სასამართლოს, ეკონომიკის, ენერგეტიკის, განათლებისა და კორუფრციასთან ბრძოლის კუთხით მიმდინარე რეფორმებით. მზად ვართ შემდგომშიც გავაგრძელოთ ოპოზიციციასთან მუშაობა ყველა ამ საკითხზე, საკონსტიტუციო რეფორმის ჩათვლით", - აღნიშნა ბარამიძემ.
მისივე თქმით, საქართველოს ხელისუფლებამ არაერთხელ დაადასტურა ერთგულება თავისუფლებისა და ლიბერალური დემოკრატიის ფასეულობების მიმართ და საქართველოს აქვს მტკიცე განზრახვა ტერიტორიების ოკუპაციასთან დაკავშირებული პრობლემების, უმუშევრობისა და სიღარიბის დასაძლევად გააგრძელოს დემოკრატიული და ლიბერალური ეკონომიკური რეფორმები ქვეყნის მოდერნიზაცია, დეცენტრალიზაცია და შეუპოვარი ბრძოლა კორუფციის წინააღმდეგ, რათა მიაღწიოს მშვოდობას, უსაფხთოებასა და კეთილდღეობას.
"ჩვენთვის სასარგებლო იქნება ნატოს სამოკავშირეო ოფისის მხარდაჭერა და ყოველდღიური კომუნიკაცია. ოფისის საქმიანობა მნიშვნელოვან როლს შეასრულებს საქართველო ნატოს კომისიისა და წლიური ეროვნული პროგრამის მთავარი მიზნის საქართველოს ნატოში გაწევრიანების მისაღწევად. საქართველო სრულად იყენებს ამ ინსტრუმენტს, რომელიც მყარ საფუძველს უქმნის ალიანსს ბუქარესტის სამიტის გადაწყვეტილების განსახორციელებლად. ბუქარესტის სამიტის შემდეგ აღარ არსებობს კითხვა გახდება თუ არა საქართველო ნატოს წევრი, არამედ საუბარია უკვე იმაზე თუ როგორ და როდის მოხდება ჩვენი ქვეყნის ალიანსში გაწევრიანება", _ განაცხადა ბარამიძემ.
მისივე თქმით, ქართული მხარე ელოდება ლისაბონის სამიტს, სადაც ნატოს ახალი სტრატეგიული კონცეფცია იქნება მიღებული. ამასთან ბარამიძემ იმედი გამოთქვა რომ ახალი კონცეფცია კიდევ უფრო გაამყარებს ალიანსის ერთობას, მის ფასეულობებს, როგორიცაა თავისუფლება, დემოკრატია, სუვერენიტეტისა და ტერიტორიული მთლიანობის მხარდაჭერა.
