ეკვადორში სახელმწიფო გადატრიალების მცდელობა დაფიქსირდა. ქვეყნის პოლიციის ნაწილი ეკვადორის პრეზიდენტ 47 წლის რაფაელ კორეას აუჯანყდა. პრეზიდენტის სასახლესთან მომიტინგეების წინაშე სიტყვით გამოსვლისას, მას მეამბოხეებმა სხვადასხვა საგნები და ცრემლსადენი გაზი ესროლეს. შედეგად პრეზიდენტმა ფეხის დაზიანება მიიღო. ინციდენტის შედეგად რეზინის ტყვიით თავში დაიჭრა ეკვადორის საგრეო საქმეთა მინისტრიც.
დაშავებული კორეა საავადმყოფოში გადაიყვანეს, თუმცა მეამბოხეებმა იქაც მიაკითხეს და საავადმყოფოს შენობას ალყა შემოარტყეს. რამდენიმე საათის განმავლობაში პრეზიდენტი შენობიდან გამოსვლას ვერ ახერხებდა. მოგვიანებით, ქვეყნის შეიარაღებულმა ძალებმა პრეზიდენტს მხარდაჭერა გამოუცხადეს და აჯანყება ჩაახშეს.
რამდენიმე საათის განმავლობაში აჯანყებულმა პოლიციელებმა კიტოს საერთაშორისო აეროპორტის დაკავებაც მოახერხეს. მემბოხეები სახელმწიფო ტელევიზიის ბლოკირებასაც ცდილობდნენ, თუმცა უშედეგოდ.
ეკვადორის დედაქალაქში მიმდინარე არეულობის დროს პერუმ და კოლუმბიამ საზღვრები ჩაკეტეს.
კიტოში მომხდარი არეულობის შედეგად ჯამში 2 ადამიანი დაიღუპა და ათეულობით დაშავდა.
არეულობის დაწყების მიზეზი ქვეყნის კონგრესის მიერ მიღებული კანონი გახდა, რომლის მიხედვითაც სამხედროებს ჩინის ზრდასთან ერთად ხელფასი აღარ ემატებათ. კანონის მიხედვით ხუთიდან შვიდ წლამდე იზრდება ინტერვალი, რომლის შემდეგაც ჯარისკაცები ახალ წოდებას იღებენ.
ცნობისათვის, 47 წლის პროფესიით ეკონომისტმა, რაფაელ კორეამ ეკვადორში ძალაუფლება 2007 წელს აიღო ხელში. ქვეყნის მოსახლეობამ 2009 წელს იგი პრეზიდენტად ხელმეორედ აირჩია.