საქართველოს პრეზიდენტ მიხეილ სააკაშვილის განცხადებით, კონსტიტუცია არ უნდა იყოს პიროვნებაზე მორგებული. ამიტომ ხდება ძალთა გადანაწილება
მისი განმარტებით, ახალი პროექტის მიხედვით, პარლამენტი ირჩევს მინისტრთა კაბინეტს, მაგრამ პრეზიდენტის როლი ქვეყანაში არ უნდა იყოს ბოლომდე შესუსტებული, რადგან ქვეყნის 20% ოკუპირებულია და არ შეიძლება, რომ ქვეყანას არ ჰყავდეს ძლიერი, ეფექტური პირველი პირი.
მისი განმარტებით, საქართველო ახალი კონსტიტუციის მიღებით გადადის რთულ სიტემაზე, რომელიც მოითხოვს უფრო დახვეწილ პოლიტიკურ კულტურას.
"ბევრად უფრო დალაგებული პოლიტიკური სიტემა გვაქვს დღეს და ეს არის "ნაციონალური მოძრაობის" დამსახურება. ჩვენ გვყავს პოლიტიკური პარტნიორები და ოპონენტები ერთდროულად, რომლებიც პარტნიორები არიან მთავარ საკითხებზე და იზირებენ, მაგრამ ძალიან მკაცრად გვაკრიტიკებენ სხვა საკითხებზე. ეს მათი დიდი სიძლიერეა, რომ შეუძლიათ მთავარ ჩარჩოში ერთი თამაშის წესებით ვითამაშოთ და შანსი გაუჩნდეთ, რომ მოგვიგონ. ჩვენი ამოცანაა მივიყვანოთ რეფორმა ბოლომდე", - განაცხადა სააკაშვილმა.
სააკაშვილმა აღნიშნა, რომ საკონსტიტუციო და სხვა რეფორმების დროს ძალიან ბევრი რჩევა და ზეწოლა იყო მსოფლიო საზოგადოების მხრიდან და მათ რომ ყველა ის დარიგება დაეჯერებინათ, ქვეყანა აღარ იარსებებდა.
მან მოიყვანა მოლდოვის მაგალითი: "საქართველო არ უნდა აღმოჩნდეს მოლდოვის მაგვარ სიტუაციაში, სადაც ყველა საერთაშორისო რჩევა და მოთხოვნა გაითვალისწინეს, მაგრამ ერთი წელია ხელისუფლება პარალიზებულია", - განაცხადა საქართველოს პრეზიდენტმა.
