საქართველოს პრეზიდენტმა მიხეილ სააკაშვილმა ჯანდაცვისა და განათლების მინისტრები შეაქო. პრეზიდენტის განცხადებით, საქართველოს განათლებისა და მეცნიერების მინისტრმა დიმიტრი შაშკინმა რეფორმები კარგად დაიწყო და ახლა უფრო რთულ ეტაპზე გავიდა. პრეზიდენტი საქართველოს შრომის, ჯანმრთელობის დაცვისა და სოციალური უზრუნველყოფის მინისტრ სანდრო ურუშაძის მუშაობითაც კმაყოფილია და ახადებს, რომ ურუშაძემ ნაყოფიერად უნდა იმუშაოს სოციალურ სფეროში და მიზანმიმართული პოლიტიკა აწარმოოს სოციალურად დაუცველი ადამიანების დასაცავად. ამის შესახებ პრეზიდენტმა ავლაბრის რეზიდენციაში ისაუბრა, სადაც "ნაციონალური მოძრაობის" და მთავრობის წევრებს შეხვდა.
"ჩვენ გვყავს ძალიან კარგი მინისტრი სოციალურ სფეროში. მასთან ერთად უნდა ვაწარმოოთ მიზანმიმართული პოლიტიკა დაუცველების დასაცავად", - აღნიშნა პრეზიდენტმა.
სააკაშვილმა განათლების სისტემაში განხორციელებულ რეფორმებზე საუბრისას, ლოტოტრონის მეშვეობით დირექტორების დანიშნვა გაიხსენა და ამ ფაქტს სავალალო უწოდა, თუმცა მისი თქმით, მთავრობამ "ამ შეცდომაზე ისწავლა" და დღეს ინგლისურის მასწავლებლების პროგრამას მსოფლიო შენატრის.
პრეზიდენტმა აღნიშნა, რომ ბათუმში თანამდროვე ტექნოლოგიებით აღჭურვილი უნივერსიტეტის გახსნაც იგეგმება.
"რეფორმები შაშკინმა უნიკალურად კარგად დაიწყო, მაგრამ შემდეგი ეტაპი რეფორმებისა უფრო რთულია. ეროვნული გამოცდების კუთხით კარგი ოპერაცია ჩავატარეთ, მაგრამ ბევრი რამ ჩაგვივარდა, მაგალითად, ლოტოტრონის გამო დაშვებული შეცდომა. თუმცა ვისწავლეთ უფრო რთული რაღაცების კეთება. ინგლისურის მასწავლებლების პროგრამას მსოფლიო შენატრის. ახლა გვინდა ბათუმში თანამედროვე ტექნოლოგიების უნივერსიტეტის გაკეთება, მოვიზიდოთ ასობით მილიონი დოლარი. სასწავლებელი დიპლომიან უმუშევარს კი არ უნდა უშვებდეს, არამედ კურსდამთავრებულს კონკრეტული პროფესია უნდა ჰქონდეს, რომლითაც დაიწყებს მუშაობას ბათუმში, ჩხოროწყუში, სიღნაღში, თელავში, ზუგდიდში და კონკურენტი იქნება იმისი, ვინც ლოს-ანჯელესში, სან-ფრანცისკოში ან ტოკიოში მუშაობს. ამის საშუალებას იძლევა თანამედროვე ტექნოლოგიები", - აღნიშნა პრეზიდენტმა.
