საქართველო ახალ ეტაპზე გადადის და მას ბევრი გამოწვევა აქვს. აცხადებს საქართველოს პრეზიდენტი მიხეილ სააკაშვილი და აღნიშნავს, რომ გარდა საგარეო გამოწვევებისა, საქართველო ამჟამად საშინაო გამოწვევების წინაშეც დგას და ეს გამოწვევა, ხალხის ყოველდღიური ყოფაა.
"დღეს გადავდივართ ახალ ეტაპზე. საქართველოს ბევრი გამოწვევა აქვს", - განაცხადა საქართველოს პრეზიდენტმა მიხეილ სააკაშვილმა პარტია "ნაციონალური მოძრაობისა" და მთავრობის წევრებთან შეხვედრისას.
"საქართველო საგარეო და საშინაო გამოწვევების წინაშე დგას. ჩვენი ტერიტორიების 20% ოკუპირებულია დაუნდობელი, მეზობელი ძალის მიერ. მეორე გამოწვევა არის ჩვენი ხალხის ყოველდღიური ყოფა. ხალხს ძალიან უჭირს, ფასები იზრდება და ეს ყველაზე მეტად ურტყამს გაჭირვებულებს", _ აცხადებს სააკაშვილი და დასძენს, რომ შეიძლება ამერიკელისთვის, გერმანელისთვის, იაპონელისთვის პირველადი მოხმარების პროდუქციის 10%-ით გაძვირება მთავარი საზრუნავი არ იყოს, მაგრამ იმ ქვეყნისთვის სადაც ყოველდღიური ბრძოლაა არსებობისთვის, ამას ძალიან დიდი მნიშვნელობა აქვს.
"არანაირ ჯადოსნურ მეთოდებს არ ვფლობთ ფასების დაწევისას, მაგრამ ყველაფერი უნდა გავაკეთოთ, რომ ბაზარი იყოს დივერსიფიცირებული", _ განაცხადა საქართველოს პრეზიდენტმა.
მისი თქმით, საქართველოს ბევრი რამ ადრეც უნდა გაეკეთებინა.
"ხორბალის სამი თვის წინ უფრო ნაკლები ღირდა, ვიდრე ახლა. რაღაც ნაწილი ავიღეთ, მაგრამ უფრო მეტი უნდა შეგვეძინა", _ აცხადებს სააკაშვილი.
