იტალიელმა ხელოვნებათმცოდნემ სილვია დანეზი სკუარცინამ კარავაჯოს უცნობი ტილო აღმოაჩინა. ინფორმაციას ამის შესახებ ბლოგი "egiziotrombetta.com"-ი ავრცელებს.
მკვლევარის თქმით, ტილოზე შესაძლოა გამოსახული იყოს ფილოსოფოსი, კათოლიკური და მართლმადიდებლური ეკლესიის წმინდანი და ღვთისმეტყველი ავრელიუს ავგუსტინე, რომელიც ასევე ნეტარი ავგუსტინეს სახელითაა ცნობილი.
სილვია დანეზი სკუარცინა ტილოს საკმაოდ დიდად აღწერს, თუმცა იქვე აცხადებს, რომ ამ დროისათვის ტილოს შესახებ ინფორმაცია მწირია. მისი ინფორმაციით, საქმე იმაში მდგომარეობს, რომ ტილო კერძო კოლექციაში იმყოფება და მისი მფლობელი იტალიაში არ ცხოვრობს.
ამ ტილოს არსებობის შესახებ ხელოვნებათმცოდნემ საარქივო დოკუმენტების წყალობით გაიგო, რომლებსაც კავშირი აქვთ იტალიელი არისტოკრატის ვინჩენცო ჯუსტინიანის კოლექციასთან. იგი XVI-XVII საუკუნეებში ცხოვრობდა და კარავაჯოს თანამედროვე იყო. სწორედ მან ერთ-ერთმა პირველმა დაიწყო კარავაჯოს ტილოების შეგროვება.
სილვია დანეზი სკუარცინას მიერ შეგროვილი დოკუმენტების თანახმად აღნიშნული ტილო ვინჩენცო ჯუსტინიანის კოლექციაში იყო და მას კარავაჯოს ხელმოწერა ჰქონდა.
