ქართულ ღვინოზე თურქეთში დიდი მოთხოვნა არ არის და შესაბამისად 1 მილიონიანი კვოტის ათვისება ვერ მოხდება. როგორც ღვინის მწარმოებელ კომპანიებში განმარტავენ, დღეისათვის თურქეთში სანდო პარტნიორის მოზიდვა ჭირს და ქართულ კომპანიებთან ურთიერთობისთვის მხოლოდ წვრილი თურქული კომპანიები არიან მზად. ისინი კი დიდი სანდოობით ვერ სარგებლობენ.
შეგახსენებთ, რომ საქართველოსა და თურქეთს შორის გაფორმებული თავისუფალი ვაჭრობის შესახებ ხელშეკრულების თანახმად, საქართველოს თურქეთში 1 მლნ ლიტრი ღვინის შეტანა, ყოველგვარი საბაჟო გადასახადის გარეშე შეუძლია.
"ჩვენ თურქეთთან თავისუფალი ვაჭრობის ხელშეკრულებაზე გვაქვს მოწერილი ხელი. ამ ხელშეკრულების მიხედვით, თურქეთში მილიონი ლიტრი ღვინო ყველანაირი საბაჟო მოსაკრებლის გარეშე შეგვიძლია გავიტანოთ. აღსანიშნავია, რომ თურქეთში ღვინოზე საბაჟო მოსაკრებელი საკამოდ მაღალია. მიუხედავად ამისა, ჩვენ მხოლოდ 40-50 ათასს, მაქსიმუმ 60 ათას ლიტრის კვოტას ვითვისებთ", _ განაცხადა მთავრობის სხდომაზე ნიკა გილაურმა.
შეგახსენებთ, რომ იანვარ-აგვისტოში საქართველოდან თურქეთში 66 ათას 768 ბოთლი ღვინის ექსპორტი განხორციელდა, მაშინ როდესაც 2009 წლის მონაცემებით რვა თვეში საქართველოდან თურქეთში 10 ათას 242 ბოთლი ღვინოა გადაზიდული
