რუსეთსა და იაპონიას შორის უახლოეს მომავალში შესაძლოა ურთიერთობები დაიძაბოს. ამის მიზეზი რუსეთის პრეზიდენტის მიერ კურილიის კუნძულების სამხრეთ ნაწილში განხორციელებული ვიზიტი შეიძლება იქცეს. იაპონიის პრემიერმა უკვე გააფრთხილა დიმიტრი მედვედევი, რომ ამ ვიზიტის განხორციელებას არ ურჩევდა, მიუხედავად ამისა, როგორც ირკვევა მედვედევი იაპონიის პრემიერის რჩევის გათვალისწინებას არ აპირებს და აცხადებს, რომ სამხრეთ კურილის კუნძულებზე აუცილებლად წავა.
რუსეთის პრეზიდენტმა პირობა დადო, რომ უახლოეს მომავალში სამხრეთ კურილიის კუნძულებს მოინახულებს. ეს ის ტერიტორიაა, რომელსაც იაპონია თავის საკუთრებად მიიჩნევს.
ინფორმაცია იმის შესახებ, რომ შესაძლოა რუსეთის პრეზიდენტმა ჩინეთში ვიზიტის შემდეგ კურილის კუნძულები მოინახულოს მედიაში ჯერ კიდევ რამდენიმე დღის წინ გაჩნდა. ამ ინფორმაციის გაჟღერებისთანავე იაპონიის პრემიერმა ნაოტო კანმა გააკეთა განცხადება იმის შესახებ, რომ მისი ქვეყანა სამხრეთ კურილის კუნძულს Yთავის ტერიტორიად მიიჩნევს და მედვედევს მიანიშნა იმის შესახებ, რომ იქ ვიზიტის განხორციელება საჭირო არ არის.
მიუხედავად იაპონიის პრემიერის გაფრთხილებისა მედვედევმა მალევე გააკეთა განცხადება იმის შესახებ, რომ იგი სამხრეთ კურილის კუნძულს აუცილებლად მონახულებდა. "აუცილებლად გავფრინდები იქ. ეს ძალიან მნიშვნელოვანი რეგიონის ჩვენი ქვეყნისათვის", _ განუცხადა მედვედევმა დღეს ჟურნალისტებს. მისივე თქმით, "სამწუხაროდ, ახლა იქ საფრენი ამინდი არ არის, მაგრამ ჩვენ იქ ვიზიტს უახლოეს მომავალში აუცილებლად განვახორციელებთ", _ აცხადებს რუსეთის პრეზიდენტი.
აღსანიშნავია, რომ იაპონური მედია უკვე ავრცელებს ინფორმაციას იმის შესახებ, რომ რუსეთის პრეზიდენტის მიერ სამხრეთ კურილის კუნძულებზე ჩასვლა შესაძლოა უარყოფითად აისახოს ორი ქვეყნის ურთიერთობებზე.
"იმ შემთხვევაში თუკი დიმიტრი მედვედევი იქ მაინც ჩავა, ეს უარყოფითად აისახება რუსეთ-იაპონიის ურთიერთობებზე, ასევე მოლაპარაკებებზე ტერიტორიულ საკითხთან დაკავშირებით და იაპონური მხარე იძულებული იქნება ხისტი პასუხი გასცეს ყოველივე ამას", _ წერს იაპონური მედია იაპონიის მთავრობაში არსებულ წყაროზე დაყრდნობით.
შეგახსენებთ, რომ კურილიის კუნძულების ოთხ კუნძულზე იაპონია პრეტენზიას აცხადებს და თავისი პრეტენზიას საფუძვლად 1855 წელს გაფორმებულ ორმხრივ ტრაქტატს უდებს ვაჭრობისა და საზღვრების შესახებ. მოსკოვის პოზიცია კი იმაში მდგომარეობს, რომ სამხრეთ კურილიის კუნძულები საბჭოთა კავშირის შემადგენლობაში (სამართალმემკვიდრე კი რუსეთის ფედერაციაა) მეორე მსოფლიო ომის შემდეგ შევიდა და რუსეთის სუვერენიტეტი ამ კუნძულებზე ეჭვგარეშეა.