"ხელისუფლებაში უნდა მოვიდეს რომელიმე კონკრეტული პარტია და არა ერთმანეთისგან განსხვავებული აზრების მქონე პირების გაერთიანება", - ამის შესახებ "რესპუბლიკური პარტიის" ერთ-ერთმა ლიდერმა თინა ხიდაშელმა კავკასიის მედია კლუბში გამართულ პრესკონფერენციაზე განაცხადა.
როგორც ხიდაშელმა განაცხადა, ოპოზიციური პარტიების გაერთიანება ამ ეტაპზე გამორიცხულია და თუ ეს მაინც მოხდა, "რესპუბლიკელები" მასში მონაწილეობას არ მიიღებენ.
"ხელისუფლებაში უნდა მოვიდეს პოლიტიკური პარტია და არა ერთმანეთისგან განსხვავებული აზრების მქონე პარტიებისა და პირების გაერთიანებები. საქართველოს სულ ასეთი მოძრაობები და ერთობები მართავს. ჯერ იყო "მრგვალი მაგიდა'', შემდეგ "მოქალაქეთა კავშირი" და ბოლოს "ნაციონალური მოძრაობა". ამ მოძრაობების წევრებს ხელისუფლებაში მოსვლის შემდეგ ქვეყნის ინტერესების ნაცვლად პირადი ინტერესები გაუჩნდათ, რამაც ქვეყანა ძალიან ცუდ მდგომარეობაში ჩააყენა", - განაცხადა ხიდაშელმა.
