დღეს, არასამთავრობო ორგანიზაციათა კოალიციამ, პარლამენტის წინ, საპროტესტო, "მდუმარე აქცია" მოაწყო. მომიტინგეები კონსტიტუციის ახალ პროექტთან დაკავშირებით, საჯარო დისკუსიების დაწყებასა და პარლამენტში კონსტიტუციის პროექტის განხილვის შეჩერებას მოითხოვდნენ. ამასთან, აქციის ორგანიზატორებმა დაიწყეს შეგროვება საგანგებო მიმართვაზე ხელმოწერებისა, რაც პარლამენტში უნდა შევიდეს.
დღესვე, აქციის მონაწილეები შეთანხმდნენ, რომ, ყოველდღე, 12:00 საათზე, პარლამენტის წინ აქციას გამართავენ.
როგორც დღეს გამართულ მიტინგზე აქციის ერთ-ერთმა ორგანიზატორმა და საზოგადოებრივი საკონსტიტუციო კომისიის წევრმა ლია მუხაშავრიამ განაცხადა, პარლამენტის წინ აქციები იქამდე გაგრძელდება, ვიდრე უმრავლესობის წევრები საზოგადოების მოთხოვნას არ გაითვალისწინებენ და უკანონო კონსტიტუციის განხილვას არ შეწყვეტენ.
"ჩვენ აქ ყოველდღე შევიკრიბებით, სანამ ყრუ პარლამენტი ჩვენს ხმას არ გაიგებს და ჩვენ მოთხოვნებს არ გაითვალისწინებს", - განაცხადა ლია მუხაშავრიამ.
დღევანდელ აქციაზე აღინიშნა, რომ იწყება ხელმოწერების შეგროვება პეტიციაზე, რომელიც პარლამენტისაგან კონსტიტუციის ახალი პროექტზე განხილვის შეჩერებას ითვალისწინებს.
"ხელისუფლება ხალხის ნების გარეშე, მხარს უჭერს კონსტიტუციის უკუღმართი ცვლილებების განხორციელებას. ამ ცვლილებებს მხარს უჭერს საპარლამენტო უმრავლესობაც და უმცირესობის უმრავლესობაც დიმიტრი ლორთქიფანიძის გარდა. აღნიშნული ცვლილებები მორგებულია იმაზე, რომ მიხეილ სააკაშვილს 2013 წლიდან გაუხანგრძლივონ ქვეყნის მეთაურის სავარძელი ოღონდ, ამაჯერად პრემიერ-მინისტრის რანგში", - განაცხადა აქციაზე მყოფმა საქართველოს პარლამენტის დეპუტატმა გია ცაგარეიშვილმა.
ცნობისათვის: დღევანდელ აქციაში არასამთავრობო ორგანიზაციათა კოალიცია: „ადამიანის უფლებათა პრიორიტეტი", „თავისუფალი აზრის სახლი", „გადაარჩინე სიცოცხლე", „კოალიცია სამოქალაქო განვითარებისათვის", „კავკასიის ქალთა ქსელი" და „დამოუკიდებელ ადვოკატთა პროფკავშირი" მონაწილეობდა. ასევე, დღეს, პარლამენტის წინ იმყოფებოდნენ დეპუტატი გია ცაგარეიშვილი, "სოლიდარობა უკანონო პატიმრების" ლიდერი ეკა ბესელია და სხვა საზოგადოებისთვის ცნობილი პოლიტიკოსები და სამეცნიერო წრეების წარმომადგენლები.
