აფხაზეთის ავტონომიური რესპუბლიკის მთავრობის ორგანიზებით, სოხუმის დაცემის მე-17 წლისთავთან დაკავშირებით, 1992-1993 წლებში აფხაზეთის ტრაგიკული მოვლენებისადმი მიძღვნილი საღამო "27 სექტემბერი" გაიმართა და ომის თემაზე შექმნილი ფოტოგამოფენა მოეწყო.
ღონისძიებას აფხაზეთის მთავრობის თავმჯდომარე დაესწრო. გიორგი ბარამიამ საზოგადოებას სიტყვით მიმართა და ქართველებსა და აფხაზებს შერიგებისკენ კიდევ ერთხელ მოუწოდა.
"ბევრი ვისაუბრეთ წარსულზე. მინდა ყურადღება აწმყოსა და მომავალზე გავამახვილო. ბევრს ნიშნავს, რომ ამ სცენაზე ერთად დგანან ის ქართველი და აფხაზი ახალგაზრდები, რომლებმაც ერთობლივად უნდა შექმნან საქართველოს მომავალი. მთავარია ერთად დოგმა და არსებული პრობლემის ერთობლივად გადალახვა, რაც საწინდარი იქნება აფხაზეთში ჩვენი უპირობო დაბრუნების", - განაცხადა ბარამიამ.
ხსოვნის საღამოს სასჯელაღსრულების, პრობაციისა და იურიდიული დახმარების მინისტრი ხათუნა კალმახელიძე, საქართველოს პარლამენტის წევრები, ცხუმ-აფხაზეთის მიტროპოლიტი მეუფე დანიელი და დევნილი საზოგადოების წარმომადგენლები ესწრებოდნენ.
