საქართველოს პრეზიდენტი მიხეილ სააკაშვილი ტყუის, როდესაც აფხაზ და ოს ხალხს ელაპარაკება. ამის შესახებ "დემოკრატიული მოძრაობა - ერთიანი საქართველოსთვის" ლიდერმა, ნინო ბურჯანაძემ, პარტიის ოფისში გამართულ ბრიფინგზე განაცხადა.
"სააკაშვილი ტყუის, როცა ელაპარაკება აფხაზ და ოს ხალხს. აფხაზებსაც და ოსებსაც კარგად ახსოვთ, ვისი უჭკუო ქმედებით იქნა გამოწვეული აგვისტოს ტრაგედია. სააკაშვილი გვეუბნება გაეროს ტრიბუნიდან, რომ სიმამაცეს თურმე ბევრი რამის გაკეთება შეუძლია და მამაც ლიდერებზე საუბრობს, მაშინ, როდესაც გორში სტუმრებიც მიატოვა, მასპინძლებიც, ჯარიც და საკუთარ დაცვას გასწრო სირბილით. ეს ელემენტარული ცინიზმია, როდესაც ადამიანი თავის დაცვას ასწრებს და მთელმა მსოფლიომ ნახა, როგორ იყო გორში, მიწაზე დაგდებული. ის ლაპარაკობს კონსტრუქციული ცალმხრივი მიდგომის პრიორიტეტებზე, რომ მომთმენია ქვეყანაში განვითარებული მოვლენების, თუნდაც იმაზე, რაც აფხაზეთში ხდება. რატომ არ იყო კონსტრუქციულად ცალმხრივად მიდგომის მომხრე 2008 წელის აგვისტოში, რა შეცვალა ამ მიდგომების განხორციელებაში 2008 წელის აგვისტოდან დღემდე?" - აღნიშნა ბურჯანაძემ.
ბურჯანაძის შეფასებით, სააკაშვილი მშვიდია, როდესაც უყურებს, როგორ ტეხს ხელისუფლება სიტყვას, რომელიც დევნილებს არჩევნებამდე მისცეს საცხოვრებელი ფართების დაკანონებასთან დაკავშირებით; როდესაც დევნილები მეორედ და მესამედ ხდებიან დევნილები საკუთარ მიწაზე; როდესაც თავიდან იშორებს დედაქალაქიდან ნეგატიურად განწყობილი დევნილების მასას.
"სააკაშვილი არ არის მშვიდი და მომთმენი მაშინ, როდესაც დაინახავს, რომ მის ხელისუფლებას შეიძლება რაიმე საფრთხე დაემუქროს", - აღნიშნა მან.
