"დემოკრატიული მოძრაობა - ერთიანი საქართველოსთვის" ლიდერმა, ნინო ბურჯანაძემ, საქართველოს პრეზიდენტ მიხეილ სააკაშვილის გაეროში გამოსვლას სამარცხვინო უწოდა.
"სამარცხვინო იყო საქართველოს პრეზიდენტის გამოსვლა გაერთიანებული ერების ორგანიზაციის ტრიბუნიდან. მინდა დავუსვა საქართველოს პრეზიდენტს კითხვა - სად არის დაპირებული დემოკრატიის ტალღა, რომელიც ორი წლის წინ გაეროს ტრიბუნიდან მოვისმინეთ. გჯერათ, რომ საქართველოში სიღარიბე შემცირდა? ჩვენ სულ სხვა მონაცემები გვაქვს, რომ ღატაკი ოჯახების რაოდენობა არათუ შემცირდა, პირიქით ბოლო წლების განმავლობაში გაიზარდა", - აღნიშნა ბურჯანაძემ.
მისი მტკიცებით, მსოფლიო ბანკის სტატისტიკის თანახმად, ღარიბები და ღატაკები საქართველოს მოსახლეობის თითქმის 2/3-ს შეადგენს და თუ ასე გაგრძელდა ქვეყანაში ე. წ. რეფორმები და ეკონომიკური განვითარება, ღარიბების რაოდენობა 60%-ს მიაღწევს, ხოლო ღატაკების რაოდენობა 25%-ით გაიზრდება.
"სააკაშვილი ამაყობდა იმით, რომ საქართველო ბიზნესკლიმატის დარგში წამყვან ადგილზეა. მას არაფერი არ უთქვამს იმის თაობაზე, რომ უმნიშვნელოვანესი ინდექსების მიხედვით, როგორც არის საკუთრების დაცვა, რომელიც ბიზნესის განვითარებისთვის გადამწყვეტია, ქვეყანა არის 120-ე ადგილზე, მაკროეკონომიკური განვითარების თვალსაზრისით 130-ე ადგილზე, ასევე საქართველო გაცილებით ჩამორჩება ჩვენი რეგინის მეზობელ სახელმწიფოებს, როგორიც არის აზერბაიჯანი და სომხეთი", - აღნიშნა პარლამენტის ყოფილმა თავმჯდომარემ.
