ქართველი სამშვიდობოები მსოფლიოში ყველა სამშვიდობო კონტიგენტიდან უნდა გაირიცხონ. აცხადებს რუსი პოლიტოლოგი, სამხედრო პროგნოზირების ცენტრის ხელმძღვანელი ანატოლი ციგანოკი.
მისივე თქმით, ჩრდილოატლანტიკური ალიანსის პოზიციამ დიდი გავლენა მოახდინა 2008 წლის აგვისტოს კონფლიქტზე. "ნატომ გააკეთა ყველაფერი ამ ომის პროვოცირებისათვის", _ აცხადებს ციგანოკი.
მისივე თქმით, რუსეთის ფედერაციას 2008 წელს ომი არ გამოუცხადებია საქართველოსთვის, ყოველთვის მხარს უჭერდა მის სუვერენიტეტსა და დამოუკიდებლობას და არ ცდილობდა საქართველოს ახლანდელი ხელისუფლების ჩამოგდებას.
ციგანოკი ასევე აცხადებს, რომ 2008 წლის აგვისტოში რუსეთმა მიუხედავად იმისა, რომ ომი მოიგო _ საინფორმაციო ომი წააგო.
"მე შევთავაზე ჩვენს ხელმძღვანელობას საინფორმაციო ჯარის შექმნა და ვფიქრობ, რომ ასეთი ჯარი შეიქმნება და მათი მიზანი იქნება სტრატეგიული ანალიზი და საინფორმაციო მხარდაჭერა", _ აცხადებს ციგანოკი.