კრიმინალურ ავტორიტეტზე ასლან უსოიანზე (დედ ჰასანი) თავდასხმა შესაძლოა რომელიმე ძალოვან მაღალჩინოსანს შეეკვეთა ან შს სამინისტროდან ან რუსეთის ფედერალური უსაფრთხოების სამსახურიდან. ცნობილი ე.წ. კანონიერი ქურდის ლიკვიდირების სურვილში შეიძლება მრავალი მხარე დაადანაშაულო, ვინაიდან უსოიანს ეკონომიკის პრაქტიკულად ყველა სფეროში თავისი ფინანსური ინტერესი ჰქონდა.
გაზეთ "ნოვაია გაზეტას" ინფორმაციით, უსოიანს ხშირად იწვევდნენ არბიტრის როლის შესასრულებლად მსხვილ კომერსანტებსა და ბანკირებს შორის წარმოქმნილი დავის დროს. გაზეთი ასევე წერს, რომ გარჩევები ყველაზე ხშირად მოსკოვის რესტორანში "სტარაია კიბიტკაში" ეწყობოდა, რომელიც თავის მხრივ ასევე არის შს სამინისტროსა და ფედერალური უსაფრთხოების სამსახურის თანამშრომელთა ერთ-ერთი საყვარელი ადგილი.
გაზეთმა ასევე გარკვია, რომ რამდენიმე წლის წინ უსოიანი ერთ ერთი მსხვილი სახელმწიფო კორპორაციის ხელმძღვანელის თხოვნით მონაწილეობა მიიღო კომერციული ბანკიდან 500 მილიარდი რუსული რუბლის "ამოღების" საქმეში. გაზეთის ინფორმაციით, ამ საქმეში "დედ ჰასანს" შს სამინისტროს ორგანიზებულ დანაშაულთან ბრძოლის დეპარტამენტის ამჟამად უკვე მსჯავრდებული ყოფილი თანამშრომლები, მაიორები დიმიტრი ცელიაკოვი და ალექსანდრე ნოსენკო ეხმარებოდნენ.
"ნოვაია გაზეტა" ასევე იუწყება, რომ ბოლო დროის განმავლობაში ასლან უსოიანი მუდმივად აფხაზეთში ცხოვრობდა. თავდასხმამდე კი მცირე ხნით ადრე მან მოსკოვში რამდენიმე შეხვედრა ჩაატარა კრიმინალებთან და კომერსანტებთან, რომელთა "დაკრიშვასაც" კრიმინალური სამყარო აწარმოებდა.
