საქართველოს ხელისუფლება აფხაზეთში ქონების დაკანონებასთან დაკავშირებით სამართლებრივი მექანიზმების შემუშავებას გეგმავს.
ამის შესახებ "ჯი-ეიჩ-ენს" საგარეო საქმეთა მინისტრის მოადგილემ ნინო კალანდაძემ განუცხადა.
"ნებისმიერი ტიპის ქმედება, რომელიც ოკუპირებულ ტერიტორიებზე ხორციელდება, არის უკანონო და არალეგიტიმური. ის ეწინააღმდეგება საერთაშორისო სამართლის იმ ნორმებს, რომელიც რუსეთის ფედერაციას თავის დროზე აქვს აღიარებული. რუსეთის პოზიციიდან გამომდინარე, ჩვენ საფრთხედ განვიხილავთ იქ არსებული ქონების უკანონო დაკანონებას, რომელიც სამომავლოდ შეიძლება პრობლემა გახდეს", - განაცხადა კალანდაძემ.
მისივე თქმით, საქართველოს ხელისუფლება არა მარტო პოლიტიკურ გზებს იყენებს, არამედ გეგმავს სამართლებრივი გზების განხილვასაც.
"ამ ეტაპზე, როდესაც ჩვენს ტერიტორიაზე საქართველოს იურისდიქცია არ ვრცელდება, აუცილებელია ისეთი მექანიზმების შემუშავება, როდესაც შესაძლებელი გახდება აღვადგინოთ იურისდიქცია. მხოლოდ ამის შემდეგ ჩაითვლება მსგავსი ქმედები უკანონოდ ", - განაცხადა მინისტრის მოადგილემ.
შეგახსენებთ, რომ აფხაზეთის სეპარატისტული ლიდერის სერგეი ბაღაფშის ბრძანების საფუძველზე, რუსულ-აფხაზური კომისია შეიქმნა. კომისია აფხაზეთში რუსეთის მოქალაქეებისთვის ქონების დაბრუნება-დაკანონების საკითხებზე მსჯელობას გეგმავს.
