რუსეთის პრეზიდენტის დიმიტრი მედვედევის ნოემბრის გამოსვლა იქნება მისი განაცხადი იმის შესახებ, რომ იგი 2012 წელს რუსეთში დაგეგმილ საპრეზიდენტო არჩევნებში მონაწილეობის მიღებას აპირებს - მიიჩნევენ რუსი ანალიტიკოსები. მათივე პროგნოზით, გზავნილის ძირითადი თემა მოდერნიზაციის მეშვეობით რუსეთის მოქალაქეების კეთილდღეობის ამაღლება იქნება. ინფორმაციას ამის შესახებ გაზეთი "ნეზავისიმაია გაზეტა" ავრცელებს.
რუსული მედია ასევე აღნიშნავს, რომ მედვედევის მმართველობის მთელი დროის განმავლობაში გაზეთის ფურცლებიდან არ ჩამოდის სიტყვა "მოდერნიზაცია". ახლა კი თავისი მესამე გამოსვლის დროს, როგორც ჩანს პრეზიდენტმა გადაწყვიტა ახსნას, რომ ეს ეკონომიკური პროცესი კარგად აისახება ცალკეული მოქალაქეების ცხოვრებაზე.
"ხოლო რაც უფრო მაღალია მოსახლეობის ცხოვრების დონე, მით უფრო მაღალ პოლიტიკურ თავისუფლებებს ფლობენ მოქალაქეები - ეს მედვედევის ერთ-ერთი სტანდარტია. მისივე მომზადებული სიტყვიდან ჩანს, რომ მის მიერ გამოცხადებული მოდერნიზაციის ხარჯზე ერთდროულად ადამიანები უფრო უკეთ იცხოვრებენ და პოლიტიკური თავისუფლებებიც მათ მეტი ექნებათ", _ წერს რუსული მედია.
მათივე ინფორმაციით, ამავე თემითაა დაკავებული ხელისუფლების პარტია. სწორედ ამ თემას მიეძღვნება პარტია "ედინაია როსიას" ფორუმი სახელწოდებით - "სტრატეგია-2020" - "მოდერნიზაციის სოციალური განზომილება". ფორუმი შუა კვირას გაიმართება. ამას გარდა, პარტიის წევრებმა ასევე გააკეთეს განცხადება ახალი მოძრაობის "როსია ვპერიოდ!" შექმნის შესახებ, რომელშიც შევლენ ბიზნესმენები, მეცნიერები და ახალგაზრდობა, რომლებსაც სურთ ქვეყნის მოდერნიზაციაში მონაწილეობის მიღება.
ექსპერტები მიიჩნევენ, რომ მედვედევის ყურაღების მკვეთრი გაზრდა სოციალური საკითხებისადმი შემთხვევითი არ არის და ფედერალური არჩევნების მოახლოებასთანაა დაკავშირებული.
პოლიტიკური ტექნოლოგიების ინსტიტუტის დირექტორის მოადგილე ალექსეი მაკარკინი აცხადებს, რომ მედვედევმა ბოლო დროს იმიჯის შეცვლაც კი დაიწყო.
მისი თქმით, სახელმწიფოს მეთაური იქცევა როგორც მეურნე კაცი, დადის რეგიონების მაღაზიებში, უბრალოდ ურთიერთობს ხალხთან რუსეთის ქუჩებში და "პობედით" რბოლაშიც კი მონაწილეობს.
"იგი ცდილობთ შეიქმნას ისეთი იმიჯი, რომელიც მომავალ საარჩევნო კამპანიაშიც გამოადგება. მედვედევი ცდილობს გაექცეს ხელისუფლებაში მყოფი ინტელიგენტის იმიჯს. 2008 წელს იგი როგორც მემკვიდრე ისე აირჩიეს. ახლა კი მან თავისი საკუთარი იდენტურობა უნდა დაამტკიცოს", _ აცხადებს მაკარკინი.
თუმცა, მაინც, მიუხედავად ყველაფრისა პრესა მაინც მკითხაობს იმის შესახებ, თუ როგორი იქნება ტანდემის მოქმედება 2012 წელს. ექსპერტები, რომლებიც სიტუაციას აკვირდებიან აცხადებენ, რომ პუტინი, როგორც ჩანს არ აპირებს დიდი პოლიტიკიდან წასვლას.
პოლიტოლოგებს ასევე მრავალი კითხვა გაუჩინა ვლადიმერ პუტინის მიერ სადისკუსიო კლუბ "ვალდაიში" ამერიკელი პრეზიდენტის რუზველტის ხსენებამ, რომელიც ოთხჯერ იყო აშშ-ს პრეზიდენტი. უცხოელმა დამკვირვებლებმა მისი განცხადება უცბადვე მიიღეს იმის მინიშნებად, რომ პუტინი დიდი ხნით აპირებს კრემლში დაბრუნებას.
