თავისუფალი და ერთიანი კავკასიის ინიციატივა დასავლეთისთვის მისაღები და გასაგებია. ამის შესახებ "ჯი-ეიჩ-ენს" კავკასიის საკითხებში ექსპერტმა მამუკა არეშიძემ საქართველოს პრეზიდენტის მიხეილ სააკაშვილის მიერ გაეროს გენერალურ ასამბლეის დებატებზე თავისუფალი და ერთიანი კავკასიის შექმნის ინიციატივის შეფასებისას განუცხადა.
"ყურადღება უნდა მივაქციოთ იმას, რომ სხვადასხვა ქართველი ლიდერი ყოველთვის ცდილობდა კავკასიასთან დაკავშირებით გარკვეული იდეის პროექტირება მოხდინა. ეს გააკეთა ზვიად გამსახურდიამაც, ედუარდ შევარდნაძემაც, ილია მეორემაც და დღეს ამას აკეთებს სააკაშვილიც. რასაკვირველია, ეს თავისთავად არის საინტერესო იდეა და უნდა ითქვას, რომ დასავლეთისთვის მისაღები და გასაგები. რამდენად მოხდება ამ იდეის რეალიზაცია, ეს მეორე საკითხია. აქაც, როგორც ყოველთვის მთავარი პროცესია. თუ ამ იდეას, რომლის პრეზენტაცია სააკაშვილმა მოახდინა იქნება გააზრებული, მყარი ბაზა საინტერესო პროცესის შექმნაც შეიძლება", - განაცხადა "ჯი-ეიჩ-ენთან" საუბარში არეშიძემ.
მისივე შეფასებით, ამ იდეას ხელის შემშლელი გარემოების იქნება, რადგან ასეთი იდეის ავტორობაზე პრეტენზიას თურქეთი აცხადებდა, კერძოდ კი კავკასიის უსაფრთხოების სარტყელის შექმნის იდეით, ასევე ნებისმიერი ასეთი იდეის რეალიზაციას ეჭვის თვალით უყურებს რუსეთი და თვლის, რომ მის გარეშე არაფერი არ უნდა გაკეთდეს.
რაც შეეხება ქართული მხარის მიერ ინიცირებულ თავისუფალი კავკასიის შექმნის პროცესში კავკასიელი ერების ჩართვას, არეშიძე მიიჩნევს, რომ "კავკასიაში სახელმწიფო წარმონაქმნები მოსკოვისკენ იხედებიან და ამ საქმეში არ ჩაერევიან - ეს ფაქტია, ერების მოზიდვა ამ იდეასთან დაკავშირებით შესაძლებელია, ოღონდ საქართველოს ხელისუფლება უნდა იყოს თანმიმდევრული და არა ისეთი, როგორც ჩერქეზების შემთხვევაში მოიქცა, როდესაც ჩერქეზების გენოციდის მიღების იდეა წამომწია და მერე უკან დაიხია და ახლა სხვა ტიპის დადგენილების მიღებას აპირებს".
