ჩინეთის სახალხო რესპუბლიკაში საქართველოს საელჩომ შემეცნებით საღამოზე, რომელიც საქართველოს კულტურისა და ისტორიის პოპულარიზაციას მიეძღვნა ჩინელ მოსწავლეებს უმასპინძლა. ღონისძიება პეკინში არსებულ YOOFU International Education Centre-თან თანამშრომლობით განხორციელდა.
შეხვედრის ფარგლებში საქართველოს ელჩმა არჩილ კალანდიამ და საელჩოს თანამშრომლებმა ჩინეთის სხვადასხვა რეგიონებიდან სკოლის მოსწავლეებს გააცნეს ინფორმაცია საქართველოს შესახებ, მისი ისტორია და კულტურა.
პეკინში მოქმედ საერთაშორისო ცენტრში 6-დან 16 წლამდე ბავშვებსა და მოზარდებს იწვევენ, პეკინისა და ჩინეთის სხვადასხვა რეგიონების სკოლებიდან. მათ უტარდებათ სპეციალური გაკვეთილები, მსოფლიოს სხვადასხვა ქვეყნების ისტორიის და კულტურის შესახებ. ამ შემთხვევაში, ცენტრმა არჩევანი საქართველოზე გააკეთა. საქართველოს შესახებ სასწავლო კურსის შემდეგ საელჩოში გამართული შეხვედრისას მოსწავლეებმა წარადგინეს პრეზენტაციები საქართველოს შესახებ. ღონისძიების დასასრულს მოსწავლეები სიგელებით დაჯილდოვდნენ.
