25 ივლისს, 11 საათზე, თბილისის მთავარ ბიბლიოთეკაში (ტოვსტონოგოვის #2), გაფორმდება სამმხრივი თანამშრომლობის მემორანდუმი თბილისის მუნიციპალიტეტის მულტიფუნქციური ბიბლიოთეკების გაერთიანებას, საქართველოს იუსტიციის სამინისტროს მმართველობის სფეროში მოქმედ სსიპ „დანაშაულის პრევენციის ცენტრსა“ და ამავე სამინისტროს სსიპ „არასაპატიმრო სასჯელთა აღსრულებისა და პრობაციის ეროვნულ სააგენტოს“ შორის.
მემორანდუმის მიზანია, აღდგენითი მართლმსაჯულების მიმართულებით, ბენეფიციარების საზოგადოებასთან ინტეგრაცია, რესოციალიზაცია, მათი განათლებისა და განვითარების ხელშეწყობა.
მემორანდუმის თანახმად, თბილისის მულტიფუნქციური ბიბლიოთეკების გაერთიანება განრიდების პროგრამაში ჩართულ არასრულწლოვანებს შესთავაზებს თბილისის მედიათეკებისა და ბიბლიოთეკების სერვისებით სარგებლობას, მედიათეკებსა და ბიბლიოთეკებში მიმდინარე ღონისძიებებსა და ლექციებზე დასწრებასა და სხვადასხვა საგანმანათლებლო და სახელოვნებო პროგრამებში მონაწილეობას.
პარალელურად, დანაშაულის პრევენციის ცენტრი და პრობაციის ეროვნული სააგენტო მედიათეკებისა და ბიბლიოთეკების გარკვეული სეგმენტების მუშაობაში ბენეფიციარების მოხალისეობრივ ჩართულობას უზრუნველყოფენ.
მემორანდუმს ხელს მოაწერენ თბილისის მულტიფუნქციური ბიბლიოთეკების გაერთიანების დირექტორი ნინო მაჭარაშვილი, დანაშაულის პრევენციის ცენტრის დირექტორის მოვალეობის შემსრულებელი ლადო ჯავახიშვილი და არასაპატიმრო სასჯელთა აღსრულებისა და პრობაციის ეროვნული სააგენტოს უფროსის მოვალეობის შემსრულებელი თათია ხოჭოლავა.
