ქართველი მეცო-სოპრანო ანიტა რაჭველიშვილი თბილისში მიმდინარე საპროტესტო აქციებს უერთდება. 29 ივნისს ის მომიტინგეებთან ერთად პროტესტს სიმღერით გამოხატავს. თავის ვიდეომიმართვაში მან მოქალაქეებს პარლამენტის წინ შეკრებისკენ მოუწოდა.
"დღეს, საღამოს, 7 საათზე, აუცილებლად უნდა შევიკრიბოთ პარლამენტთან, აუცილებლად უნდა გამოვხატოთ ჩვენი პროტესტი, უდანაშაულო ადამიანების მიმართ ძალადობიდს წინააღმდეგ, აუცილებლად მოდით, ძალიან გთხოვთ. ეს არის სამართლიანი აქცია, რომელიც ტარდება იმ ახალგაზრდების ორგანიზებით, რომლებიც არიან ჩვენი მომავალი.
მოგიწოდებთ და გთხოვთ, რომ მობრძანდეთ დღეს, მეც აუცილებლად იქ ვიქნები. გუშინ ჩამოვედი საქართველოში და ვერ მოვახერხე გუშინვე მოსვლა.
დღეიდან მე თქვენს გვერდით ვარ. სულიერად აქამდეც სულ თქვენთან ერთად ვიყავი იმიტომ, რომ ძალიან მიჭირდა შორს ყოფნა ასეთ მძიმე ჟამს, საქართველოსთვის... რუსეთი ოკუპანტია, რუსეთის კომუნისტი დიპლომატის ადგილი საქართველოს პარლამენტში არ არის, გახარია არის ჯალათი, რომელმაც დაასახიჩრა ახალგაზრდები და ერთი ადამიანის სიცოცხლე ჩააგდო საფრთხეში. დღესაც ის იბრძვის გადარჩენისთვის. ვეწინააღმდეგები იმ პროპაგანდისტულ მოსაზრებას, რომ აქციაზე დგანან ნაციონალური მოძრაობის დემაგოგები. მე ვიტყვი მათ მაგიერ, ვინც იქ დგანან. აბსოლუტურად არაფერ შუაში არ ვართ პოლიტიკასთან. ვართ მოქალაქეები, ვისაც ნამდვილად სტკივა და ვისთვისაც წარმოუდგენელია ის რომ საქართველოში პარლამენტში, სადაც იჯდა ზვიად გამსახურდია, საიდანაც გამოაცხადა საქართველოს დამოუკიდებლობა, იქ იჯდეს მტრის წარმომადგენელი“, - თქვა ვიდეომიმართვაში ანიტა რაჭველიშვილმა.
