ვაპირებთ, რომ მესამედაც გავიმარჯვოთ არჩევნებში, 2020 წელს, - ასე ეხმიანება უმრავლესობის წევრი ზაქარია ქუცნაშვილი ეკა ბესელიას მიერ ახალი პარტიის დაფუძნებას.
მისი თქმით, იდეალი გამოწვევისაგან იმით განსხვავდება, რომ ის არის მარადიული და იდეალებისთვის ბრძოლა და მსახურება არის მარადიული პროცესი.
„ამიტომ ვინც მიიჩნევს, რომ ერთი არჩევნებით ან თუნდაც ორი არჩევნებით იდეალები მიღწეული იქნება და ისინი გაქარწყლდება და მისთვის ბრძოლა და შრომა საჭირო აღარ იქნება, ეს სულ მცირე დილეტანტიზმი იქნება. ჩვენ მიღებული გვაქვს პოლიტიკური გადაწყვეტილება და ვაპირებთ, რომ მესამედაც გავიმარჯვოთ არჩევნებში, 2020 წელს. ასე, რომ „ქართული ოცნება“ 2020 წლის არჩევნებისთვის ემზადება მხოლოდ იმისთვის, რომ ისევ აჩვენოს გამარჯვება და გააგრძელოს იმ იდეალებისთვის ბრძოლა, რაც როგორც თავში გითხარით მარადიულია“, - თქვა ქუცნაშილმა.
ეკა ბესელიამ განაცხადა, რომ ახალ პოლიტიკურ პარტიას აფუძნებს. დეპუტატმა საზოგადოებას გუნდის წევრები წარუდგინა. ეკა ბესელიას გუნდში გედევან ფოფხაძე და ზვიად კვაჭანტირაძე იქნებიან. ბესელიას თქმით, პარტია 20 ივნისს დაფუძნდება. ბესელია აცხადებს, რომ მის მიერ დაფუძნებული პარტია 2020 წლის არჩევნებში მიიღებს მონაწილეობას.
